Hondo muZanu-PF iri kuenderera mberi zvapa kuti paumbwe chikwata chevanhu vashanu chiri kuenda kuManicaland kunoongorora Amai Monica Mutsvangwa avo vari kupomerwa mhosva neWomens League yebato iri yekuzvidza mudzimai wemutungamiri wenyika, Amai Grace Mugabe.
Mutevedzeri wemunyori mubazi remadzimai, Amai Eunice Sandi Moyo, vanoti Amai Mutsvangwa vakadziya moto wembavha nekupinda kwavo mumusangano wakatsigira vainge vadzingwa kuva sachigaro weManicaland, Amai Happiness Nyakuedzwa.
Amai Nyakuedzwa vaipomerwa mhosva yekuzvidza Amai Mugabe nekusanyarara apo Amai Mugabe vaitaura mumusangano wakaitwa kuManicaland mwedzi wapera.
Murume waAmai Mutsvangwa, VaChris Mutsvangwa, vanove gurukota rezvevakarwa hondo, vari kunziwo nevamwe vabude mubato vachinzi vanotsigira chikwata chinonzi cinotungamirwa nemutevedzeri wemutungamiri wenyika, VaEmmerson Mnangagwa.
KuMashonaland West kunonzi kwaitawo kunetsana mubazi reYouth League rebato sezvo paine kurwira masimba nekudzingana mubato.
Kunetsana kunonzi kwanyanyawo ku Masvingo, Mashonaland West neMashonaland East.
Amai Mugabe vari kutarisirwa kuita musangano paMurehwa Center kuMashonalnd East neMugovera.
Vanoongorora nyaya dzezvematongerwo enyika vachishanda neTrust Africa, VaBrigs Bomba, vanoti zvave kuitika muZanu-PF zvinonyadzisa uye zvadzosera bato iri kumakore akare aitongwa nemadzishe.
