Zanu PF inoti iri kugadzirira kuita sarudzo yemubato yekuti itsvage munhu achakwikwidza musarudzo yekutora chigaro chemumiriri weHeadlands muparamende.
Chigaro ichii chakasiyiwa nevaimbove munyori wezvemabasa muZanu PF, VaDidymus Mutasa, avo vakadzingwa mubato iri.
Sachigaro weZanu PF muManicaland, Va Samuel Undenge, vanoti zvichitevera danho rakatorwa nebato ravo rekudzinga VaMutasa muZanu PF, zvakakodzera kuti patsvagwe mumwe mumiriri wenzvimbo iyi.
VaUndenge vanoti sezvo mazuva ari kuswedera ekuenda kuNomimation Court nemusi wa8 Kubvumbi, bato ravo ratove nenhengo dzakawanda dziri kuda kutora chigaro ichi. Vanoti by-election iyi iri kutarisirwa kuitwa musi wa-10 Chikumi gore rino.
VaUndenge vanoti nhengo dzeZanu PF dzinosvika gumi neshanu dziri kuda kukwikwidza musarudzo ye primary yebato kuitira kuti pave nemunhu mumwe chete anozomirira bato musarudzo iyi.
VaUdenge vanoti huwandu hwakadai hwenhengo dziri kuda chigaro ichi hunoreva kukura kuri kuita tsigiro yebato iri.
VaUndenge, avo vanova zvakare gurukota rinoona nezvemhando dzemoto, vanoti kunyange hazvo vasati vave nezuva richaitwa sarudzo dzemubato ravo, nhengo hadzisati dzobvumidzwa kukambena sezvo vachida kutanga vavhetiwa nehutungamiriri hwebato.
Dzimwe dzenhengo deZanu PF dziri kuda kukwikwidza muma primary election aya dzinosanganisira vaimbove gavhuna weManicaland, VaTinaye Chigudu, sachigaro wevaimbove varwiri vehondo yerusununguko mudunhu reManicaland, VaNation Madongorere, VaChris Chingosho, VaAlbert Nyakuedzwa, Amai Elizabeth Makoni, VaNathaniel Mhiripiri, VaDakarai Mapuranga nevamwewo.
Mamwe mapato ezvematongerwo enyika haasati abuda pachena kuti achakwikwidza here kana kuti kwete musarudzo idzi.
VaMutasa, avo vakakwidza nyaya yekudzingwa kwavo muZanu Pf kudare reConstitutional Court, vachipikisa kudzingwa kwavo, vanoti vachakwikwidza musarudzo iyi.
Bato rinopikisa reMDC inotungamirwa naVaMorgan Tsvangirai rinoti harizi kuzokwikwidza musarudzo iyi kudzimara paitwa shanduko ine chekuita nekuvandudzwa kwemitemo yesarudz.
Mutauriri weMDC-T muManicaland, VaTrevor Saruwaka, vanoti hazvibatsire kupinda musarudzo iyi kana pasina vandudzo yemitemo yesarudzo inoita kuti dziitwe paine jekerere uye pasina mukana wekubiridzira.
Apo Zanu PF iri kuronga nezvesarudzo yemuHeadlands, achigaro we-MDC-T muManicaland, VaDavid Chimhini, vanotiwo bato ravo rave pachinhanho chepamberi mukuedza kuwedzera huwandu hwenhengo itsva dzinozokwanisa kuvhota musarudzo dzemuna 2018.
VaChimhini vanoti bato ravo rine hurongwa hwekunyoresa vavhoti vatsva vanosvika zviuru gumi nezvitanhatu mudunhu rinovhoterwa rega rega. VaChimhini vanoti izvi zvinokwanisika chete kana vakaziva panogara nhengo dzavo uye nekudzishanyira mudzimba vachinyoresa mazita avo pamwechete nekuvakurudzira kutora zvitupa kune vaya vasina uye nekuzononyoresa kuvhota.
VaChimhini vanoti kuvepo kwe Electronic Voters Roll panguva ino kuchavabatsira sebato mukuongorora vanhu varimo nevasimo mukuita kuti basa ravo rive nyore. Manicaland ine matunhu makumi maviri nematanhatu anovhoterwa kuti ave nevamiriri veparamende
Sachigaro weMDC –T anoti pari zvino mabasa avo ekunyoresa nhengo itsva mumatunhu ose ari kufamba nemazvo.