Mumiriri weAmerica muZimbabwe, Ambassador Bruce Wharton, vapa mari yekubatsira masangano anoita mabasa ebudiriro munharaunda dzakasiyana siyana munyika inosvika zana nemakumi mashanu ezviuru zvemadhora pasi pechirongwa chavo cheAmbassador Special Self Help Program.
Vachitaura apo vange vari kupa mari iyi kumasangano gumi nemashanu abva kumatunhu masere ematunhu gumi ari munyika, VaWharton vati rubatsiro urwu runosimbisa hushamwari pakati pevanhu vekuAmerica neZimbabwe.
Vatiwo chirongwa chavo cheSpecial Self Help chakanangana nekusimudzira magariro evanhu munharaunda kuti vakwanise kuzviritira.
Masangano awana rubatsiro rwemari nhasi anosanganisira Midlands AIDS Service Organisation, Nyanga Community Development Trust, Bhagu Village Women’S Group yekwaGutu pamwe neTaguta Co-operative yekwaChivi.
Amai Respina DzingirayivekuTaguta Co-operative vati vachashandisa mari yavapihwa mukugadzirisa chibhorani pamwe nekuisa mapombi emvura mugadheni ravo.
Sachigaro veBhagu Village Women’s Group, Amai Loice Pasipamire, vanoti chirongwa chavo chekurima murivo change chatomira nekushaya mvura uye rubatsiro rwavapihwa rwuchaita kuti vatangise kurima zvekare.
Sadunhu Siamabhechu, VaChauririra Muguve vanobva kuGokwe North, vatendawo muzinda weAmerica nerubatsiro rwavawana nhasi vachiti ruchabatira chose kuwanisa vanhu mvura munzvimbo iyi.
Rubatsiro rwakawanda rwapihwa nhasi nderwekuwanisa vanhu mvura kuti vakwanise kurima mirivo nezvimwe zvinobatsira vana vechikoro pamwe nevaya vanorarama neHIV/AIDS.
Mukurima ikoko vanhu vanozotengesawo zvirimwa zvavo vachiwana mari yekushandisa mune mamwe mabasa ebudiriro.
Pasi pechirongwa ichi, icho chakatanga makore makumi matatu nemashanu apfuura, masangano akazvimirira, zvikoro kana vedzisvondo vanopihwa rubatsira rwemari iri pakati pezviuru zvishanu nezviuru gumi zvemadhora kuti vaite mabasa ebudiriro munharaunda dzavo.
Chirongwa ichi ndechimwe chizvirongwa zvekubatsira vanhu vemuZimbabwe zvinotwa nemapazi akasiyana siyana ehurumende yeAmerica munyika.