Mutevedzeri wemutungamiri wenyika, Amai Mujuru, vakwazisana nevakuru vemauto nemapurisa pakuonekwa kwanga kuchiitwa gamba renyika, VaLloyd Kotsho Dube kuStoddard Hall muMbare vasati vanoradzikwa kuHeroes Acre.
Vakwaziswa naAmai Mujuru vanosanganisira mukuru wemauto General Constantine Chiwenga, nemumwe wavo Phillip Valerio Sibanda, pamwe nemukuru wemajeri, VaParadzai Zimondi.
Amai Mujuru, avo vasina kuenda kukongiresi ye Zanu PF iyo yakapera neMugovera zvichitevera kusawirirana kwavari kuita naVa Mugabe, vasvika pa Stodart Hall vaine vana vavo Va Mugabe vatovapo.
Amai Mujuru vamboda kurambidzwa nevasori kupinda muhoro yanga ine mutumbi wegamba renyika vakazopinda zvenharo kuti vanowonekana nemufi uyo aradzikwa kuHeroes Acre.
Pavabuda muhoro iyi, Amai Mujuru vabva vangonanga kumotokari yavo vachisvereredzwa nedzimwe nhengo dze Zanu PF dzanga dzakapfeka mbatya dzine mufananidzo waVa Mugabe.
Asi havana kuzoenda ku Heroes Acre.
Amai Mujuru vari kupomerwa mhosva yekuronga zvekubvisa Va Mugabe pachigaro nechisimba pamwe nehuori asi vari kuramba mhosva dzavari kupomerwa vachiti maoko avo akachena.
Vamwe vatsigiri veZanu PF vakaita saVa Gift Zongoro vanogara mumusha weMufakose vakurudzira Amai Mujuru kuti vakumbire ruregerero kuna Va Mugabe.
Muzukuru waVa Mugabe uye iri nhengo ye Central Committee yakadomwa neMugovera kukongiresi ye Zanu PF, Va Patrick Zhuwao, vanoti hapachina zvipoka-zvipoka mu Zanu PF vachiti bato ravo rakabatana zvisingabvire.
Vati Amai Mujuru munhu akarasika gwara remusangano ndosaka vakarambwa nevanhu.
Va Zhuwao vati nzira yakashandiswa nebato ravo kusarudza nhengo dze Central Committee inzira yakajeka kwazvo kunyange hazvo vanofungidzirwa kuti vari kutsigira Amai Mujuru vakaita saVa Webster Shamu vasina kupinzwa mukomiti iyi chero zvazvo vatsigiri vavo vekwavanobva vakange vati vapinzwe mu Central Committee.
Vachitaura pakuvigwa kwaVa Dube, Va Mugabe vati nyika yarasikirwa zvikuru nekushayika kwavakaita svondo rapera mushure mekufira kuhope vachirwara nechirwere cheshuga.
Va Dube vakaberekwa musi 25 Chikumi 1935 uye vakazove mumiriri we PF Zapu ku United Nations pamwe neku North America ne South America kubva muna 1965 kusvika muna 1972.
Kubva muna 1972 kusvika muna 1975, Va Dube vakange vari mupepeti we University of Massachusetts Press. Muna 1979, mushakabvu ndeumwe akanga ari pachikwata che PF Zapu chakaenda kunhaurirano dzakaitwa ku Lancaster House.
Nyika yawana kuzvitonga, Va Dube vakave nhengo yekomiti yepamusoro yebato re PF Zapu uye vakange vari mumwe weavo vakaita nhaurirano pakati pe Zanu PF ne Zapu dzakazoita kuti panyoreranwe chibvumirano chekubatanidza mapato maviri aya muna 1987 chinodaidwa kuti Unity Accord.
Vakazomirira Zimbabwe kunyika dzakawanda dzakaita se France, Spain, Portugal, Nigeria ne Zambia.
Mushakabvu, asiya mudzimai Agatha nevana vatatu vanoti Nozipho, Malusi na Nombuyiselo pamwe nevazukuru vatatu.
