MDC inotungamirwa naVa Morgan Tsvangirai yanyorera dare reparamende pamwe nedare reseneti tsamba dzokudzinga Va Tendai Biti nedzimwe nhengo gumi nenomwe mumatare aya zvichitevera kubuda muMDC-T kwakaitwa naVa Biti nevamwe vavo vari kuzvidaidza kuti MDC Renewal Team.
Vachitaura nevatori venhau pamuzinda webato ravo pa Harvest House, vachangobva kusarudzwa semutauriri mutsva weMDC-T, Va Obert Gutu, vati munyori mukuru webato ravo, VaDouglas Mwonzora, vanyorera mutauriri wedare reparamende, Va Jacob Mudenda, pamwe nemutungamiri wedare reseneti, Amai Edna Madzongwe, tsamba dzekudzinga Va Biti nevamwe vavo vari mumatare maviri aya.
Va Gutu vati bato ravo ratora danho iri zvichitevera kongiresi yebato ravo iyo yakapera neSvondo mu Harare.
Asi mutauriri we MDC Renewal Team, Va Jacob Mafume, vaudza Studio 7 kuti havasi kutambira danho ratorwa neMDC-T iri vachiti nyaya iyi ichiri kumatare.
Zvichakadai, Va Gutu vati kana dare reparamende pamwe neseneti vakadzinga Va Biti nevamwe vavo mumatare aya, bato ravo harisi kuzokwikwidza musarudzo dzichazoitwa kana pasina kuvandudzwa mitemo yose inobata mafambisirwo esarudzo.
Kana Zanu PF ikasavandudza mitemo inobata mafambisirwo esarudzo uye MDC-T ikaramba kupinda musarudzo idzi, Zanu PF inogona kukunda munzvimbo dzose dzinenge dzisisina vamiriri muparamende pasina kukwidzwa.
Kunyange MDC-T ikapindawo musarudzo dzekutsvaga vamiriri vatsva vanotsiva vanenge vadzingwa ava , hapana zvazvinoibatsira sezvo Zanu PF ririro bato ragara rine nhengo dzakwanda muparamende pamwe chete nemudare reseneti zvinoita kuti Zanu PF ingopasisa chero mitemo yainenge ichida.
MDC-T inoti sarudzo dzakaitwa gore rapera dzakaitwa zvisiri pachena kunyange hazvo Zanu PF ichiti yakakunda zvisina kubirira mukati.
