Sachigaro weAssembly of Women mubato reMDC-T, Amai Lynette Karenyi-Kore, vanoti hurumende inofanirwa kutora matanho akasimba ekumisa kushungurudzwa kwevanhukadzi kunyanya panyaya yemhirizhonga yezvematongerwo enyika.
Vachitaura pamusangano wekucherechedza mazuva gumi nematanhatu ekudzivirira kushungurudzwa kwevanhukadzi neChishanu muBulawayo, Amai Karenyi-Kore vati kushungurudzwa kuvanhukadzi kunodzorera nyaya dzebudiriro mumashure sezvo kuchiita kuti vamwe vakadzi vasakwanise kuita zvinopa pundutso kumhuri dzavo.
Amai Karenyi-Kore vati kunze kwekushungurudzwa mudzimba, madzimai nevanasikana munyika ndivo vanowanzobatwa zvakanyanya nemhirizhonga yezvematongerwo enyika, vachibatwa chibharo nekukuvadzwa mumhirizhonga iyi.
Vakurudzira hurumende kuti ive nemitemo yakasimba inobatsira kuti madzimai nevanasikana vasashungurudzwe mumhirizhonga yakadaro.
Zimbabwe yakasaina gwaro reUnited Nations reConvention on the Elimination of all Forms of Discrimination Against Women.
Gwaro iri rinopa hwaro hwekuti nyika dzepasi rose dzive nemitemo inodzivirira kushungurudzwa kana mhirizhonga kuvanhukadzi.
Asi Zimbabwe haisati yave nemitemo yakakwana inozadzikisa gwaro iri.
Amai Karenyi-Kore vati senzira yekucherechedza mazuva gumi nematanhatu ekudzivirira kushungurudzwa kwevanhukadzi, bazi remadzimai mu MDC-T riri kuita chirongwa chinonzi “Count Me In”
icho vari kuparura mangwana kuMasvingo senzira yekukurudzira veruzhinji kuti vabatsire mukumiswa kwekushungurudzwa kwevanhukadzi.
Mune imwewo nyaya veboka revechidki vebato reMDC-T vanoti vari kufara nekutambirwa kwechirongwa chavange vainacho chekukurudzira vechidiki vebato iri nevamwewo zvavo kuti vaongororwe ropa ravo, senzira yekucherechedza zuva reWorld Aids Day.
Munyori wezvehutano nekuchengetedzwa kwevana muMDC-T Youth Assembly, Muzvare Vimbai Mavherudze, vanoti pasi pechirongwa ichi, icho chainzi “I wanna know” vechidiki vanopfuura zviuru zvitanhatu vakaongororwa ropa ravo.
Muzvare Mavherudze vati vaishandisa Facebook, Whatsapp nenzira dzimwe dzekutaurirana dziriko mazuvano kuti vashambadze chirongwa ichi.
Chirongwa chevechidiki veMDC-T chekukurudzira vamwe vavo kuti vaongororwe ropa ichi chakatanga pakupera kwemwedzi wapfuura uye chakapera musi wa1 Zvita rinove zuva rakaiswa parutivi neUNAids reWorld Aids Day.