Vanhu vemuAmerica vabatana neMuvhuro nevanhu venyika dzepasi rino vachirangarira murwiri wekodzero dzevanhu, Doctor Martin Luther King Junior.
Vaive mutungamiri wenyika yeAmerica, VaRonald Reagan, ndivo vakatara zuva iri kuti ive horidhe muna 1983 yekurangarira mabasa aVaKing Junior ekurwira kodzero dzevanhu muAmerica.
Mu America VaKing Junior vanorangarirwa neMuvhuro wetatu muna Ndira gore roga roga, zuva riri pedyo nebhavhidhe ravo chairo.
Doctor King Junior vakaberekwa musi wa 15 Ndira 1929 muAtlanta, kuGeorgia, vakafa mushure mekupfurwa muna 1968.
Doctor King Junior vakapihwa mubairo wekurwira runyararo weNobel Peace Prize muna 1964.
Mushakabvu vaizivikanwa nekufora mumigwagwa nevamwe vachiratidzira kusafara kwavo nerusarura ganda mu America.
Mashoko avo avakataura pane mumwe musangano wakaitirwa muWashington DC ekuti "I Have A Dream" akabata moyo yevakawanda nekupa vanhu hushingi hwekurwira kodzero dzavo pasi rose.
Nyanzvi munyaya dzematongerwo enyika vari mukuru weZimbabwe Democracy Institute, Doctor Pedzisayi Ruhanya, vanoti VaKing vakapa hushingi kuvanhu vairwira rusununguko rweZimbabwe.