Accessibility links

Breaking News

VaNick Zemura Voshandisa Mafirimu Avo Kuraira Vana veZimbabwe


VaNick Zemura nechikwata chavo vachiita rimwe remafirimu avo
VaNick Zemura nechikwata chavo vachiita rimwe remafirimu avo

VaNick Zemura, vanove chizvarwa cheZimbabwe chiri muMaryland kuAmerica, vanoti munhu wakashingirira muhupenyu unokwanisa kuona zvizhinji zvezvaunoshuvira uchiri mudiki zvichibudirira

Kune vakawanda, zvishuvo zvavo zvehupenyu zvavanokura nazvo zvinonetsa kuzozvibata zvave muchero.

Asi kuna VaNick Zemura, vanove chizvarwa cheZimbabwe chiri muMaryland kuAmerica, munhu wakashingirira muhupenyu unokwanisa kuona zvizhinji zvezvaunoshuvira uchiri mudiki zvichibudirira.

VaZemura vave mumwe wenyanzvi munyaya dzekubikwa kwemafirimu nemitambo yepaterevhizheni, chipo chavanoti vakakura nacho.

VaZemura, avo vakaberekerwa kwaMukarakate kwaMurehwa, vakadzidza paGumbanjera Primary vasati vaenda paMurehwa Mission pavakaenderera mberi nemitambo yemadhirama.

Vakazoenda paSeke Teachers’ College pavakanodzidzira zvehurairidzi panguva imwe cheteyo vachirodza hunyanzvi hwavo munyaya dzemitambo idzi.

Vakazosunga twavo vakananga kuAmerica makore gumi nemashanu apfuura kwavakasvikoshanda zvakare semudzidzisi.

Asi havana kurasa chido chavo chezvemafirimu, izvo zvakaita kuti vaende kuLos Angeles kwavakanodzidzira zvekubika mafirimu pamwe nekuita mitambo.

Vakazobatana nemunin’ina wavo, VaMike Zemura, avo vari kuCanada vakaumba kambani yavo Mirazvo Production iyo yakanyoreswa zviri pamutemo muZimbabwe.

Kusvika pari nhasi, VaZemura vanoti vabika mafirimu nemitambo zvinodarika makumi maviri, uye vashandawo nenyanzvi dzinosanganisira dzekuZimbabwe, Nigeria, Ghana pamwe neAmerica.

“Kumusha ndashanda nenyanzvi dzakaita saAmai Jesesi Mungoshi, Mukoma Elijah Madzikatire nevamwe,” Vanodaro VaZemura.

Elijah Madzikatire, mwana wenyanzvi mune zvemitambo, mushakabvu Safirio Madzikatire. Amai Jesesi Mungoshi mudzimai wemunyori ane mukurumbira munyika Charles Mungoshi.

VaZemura vanoti vakatanga kushanda naMai Mungoshi pafirimu rakaitwa pamusoro pebhuku raCharles Mungoshi, ‘Makunun’unu Maodza Mwoyo’.

Rimwe remabasa avo, ifirimu idzva rakabikirwa munharaunda yeMurehwa rinonzi ‘Mwana waMwari’, iro vari kushambadza.

Zvidimbu zveFirimu, 'Mwana waMwari' rakaitwa naVaNick Zemura
please wait

No media source currently available

0:00 0:02:40 0:00

VaZemura vanoti kune vana veZimbabwe vanoda kuita zvemitambo nemafirimu asi vasina mari, shandai nesimba zvinhu zvnonaka chete rimwe zuva.

Vanokurudzirawo kuti hurumende ibatsire vezvemitambo, kunyange hazvo vachiti ivo pachavo havasati vasangana nematambudziko mukuita kwavo basa kumusha.

please wait
Embed

No media source currently available

0:00 0:04:53 0:00
Pekupinda Napo Kuti Muone Zvamuri Kuda

XS
SM
MD
LG