Bato rinopikisa reTransform Zimbabwe rinoti ringangoenda kudare repamusorosoro reConstitutional Court kuti dare iri rimanikidze mutungamiri wenyika, VaRobert Mugabe, kutara zuva resarudzo dze by-election, remusi wa 10 Chikumi sezororo kuitira kuti vashandi vakwanisewo kuenda kunovhota vakasununguka.
Munyori anoona nezvekuburitswa kwemashoko muTransform Zimbabwe, Doctor Sungai Mazando, vanoti bato ravo rakanyorera VaMugabe tsamba richisvitsa chinyunyuto chavo ichi vachivapa mazuva manomwe ekuti vapindure.
Asi mazuva aya akatodarika neMuvhuro.
Bato iri riri kutsigirwawo nerimwe bato rinopikisa reNational Constitutional Assembly, NCA, iro rinotiwo rinofunga kuti VaMugabe vakatara zuva iri vaine chikiribidi chavari kuitira.
Mutauriri weNCA, VaMadock Chivasa, vanoti VaMugabe vanofanirwa kuendesa zuva iri mukupera kwesvondo kana vatadza kuti riitwe zororo.
VaMugabe vakatara musi wa 10 Chikumi sezuva richaitwa sarudzo dzekutsiva nhengo dzeMDC Renewal Team dzakadzingwa mudare reparamende mumatunhu gumi nemana, kozotiwo kudunhu reHwedza North chigaro chakasiiwa nenhengo yeZanu PF, VaSimon Musanhu, avo vakashaya kutanga kwegore rino.
Sarudzo dzichaitwawo kuHurungwe West kuMashonaland West neHeadlands kutsiva vaive nhengo dzeZanu PF vakadzingwa vanoti VaTemba Mliswa naVaDidymus Mutasa.
Mapato ezvematongerwo enyika masere pamwe nevakazvimirira ndivo vachapinda musarudzo idzi, idzo dzakarambwa nemapato ose eMDC achida kuti mitemo ine chekuita nesarudzo itange yagadziriswa.
Doctor Mazando vanoti chimwe chichemo chavachasvitsa kuZimbabwe Electoral Commission ndechemapepa avo ekutsvaga rutsigiro ayo vanoti ari kubvarurwa nevanofungidzirwa kuti vatsigiri veZanu PF.
Vanotiwo vatsigiri vavo vari kushungurudzwawo zvekuti mumwe akatorohwa akakuwara zvekupinda muchipatara mumusha weGlen View.
Asi VaChivasa vanoti nhengo dzavo hadzisati dzashungurudzwa kusvika pari zvino sezvo dziri kukwanisa kutsvaga rutsigiro dzakasununguka.
