Vamwe vechidiki mudunhu rema Masvingo vari kugadzirira kupinda mumugwagwa musi weChishanu vachiratidzira kusafarira kwavo danho rakatorwa neZanu PF rekuita mabiko ebhavhadhe remutungamiriri wenyika, Va Robert Mugabe, musi weMugovera mudunhu ravo.
Vechidiki ava vari pasi pemusangano we Youths for Advocacy Reform and Democracy, Yard, vanoti vanoona zvisina kukodzera kuti vatungamiriri ve Zanu PF vaite mabiko emari yakawanda inosvika zviuru mazana masere emadhora ivo vachifa nenzara.
Anoona nezvekufambiswa kwebasa mu Yard muMasvingo, VaMunyaradzi Rushwaya, vanoti gadziriro yavo yekuratidzira yatova pachinhanho chepamusoro soro.
Vechidiki vari kuronga kuratidzira vanobva kumapato akasiyana siyana ayo ari kunyunyuta kuti Zanu PF haina hany'a nevanhu vanotambura, izvo zviri kuipa kuti kushandisa zvisina musoro mari yakawandisa pamabiko achaitirwa pa Great Zimbabwe.
VaRushwaya vanoti vacharatidzira vachiudza hutungamiriri hwenyika kuti havasi kufara nemabiko aya.
Vanoti dai Zanu PF iine hany'a neveruzhinji vari kutambura dai yakashandisa mari iyi mukutengera vanhu chibage kuti vawane sadza mudzimba dzavo.
VaRushwaya vanotiwo mari ichashandiswa inokwana kutenga chikafu che dunhu rose reMasvingo kusvika muna Nyamavhuvhu.
VaRushwaya vanotiwo sangano ravo rakatozivisa mapurisa kuti vachaita ratidziro iyi sezvinodiwa nemitemo yenyika.
Ratidziro iyi iri kuuya apo panguva iyo paine kufungidzirwa kuti vechidiki pamwe nevaimbova varwi verususngunuko vakarohwa nemapurisa vari kugadzirirawo imwe ratidziro yavo musi wemabiko aya.
Sachigaro wekomiti iri kugadzirira mabiko aya muMasvingo, Va Ezra Chadzamira, havana kubatika sezvo nhare mbozha yavo yanga isingaiti.
Asi vechidiki muZanu PF musi weChina chapfuura vakaudza vatori venhau kuti vakagadzirira kuteura ropa vachirwisa vose vanoda kukanganisa bhavhadhi raVaMugabe.
VaTalent Majoni, vanova nhengo ye Zanu PF yevechidiki mudunhu reMasvingo, vakati vakatogadzirira kufira mhuri yekutanga, kana kuti First Family, vachiidzivirira pane vose vari kufungirwa kuti vanoda kuzotadzisa kuitwa kwebhavhadhi zvakanaka.