Magweta maviri akaita mukurumbira mushure mekubudirira mudare repamusoro soro vachipikisa mutemo weSection 121 of the Criminal Procedure and Evidence Act vachiti waidzvanyirira kodzero dzevasungwa, VaMarufu Mandevere naVaKudzai Kadzere, vapihwa mubairo wepamusoro soro weZimbabwe Lawyers for Human Rights - Human Rights Lawyer of the Year 2015 Award.
Vaviri ava vatora mubayiro wepamusoro soro uyu mushure mekunge vadomwa semagweta akashanda zvakasimba mudunhu re Northern Region, iro rinosanganisira matunhu makuru anoti Harare, Mashonaland Central, Mashonaland East neMashonaland West.
Mubairo wedunhu reSouthern Region, iro rine matunhu makuru anoti Bulawayo, Matabeleland South, Matabeleland North neMidlands, waenda kuna VaBrian Dube naVaTanaka Muganyi.
Mubairo weEastern Region, iyo ine matunhu anoti Masvingo neManicaland, waenda kuna VaLangton Mhungu.
Mutauriri weZimbabwe Lawyers for Human Rights, VaKumbirai Mafunda, vanoti mubairo weChairperson's Special Commendation waenda kuna VaGift Mtisi naVaTonderai Bhatasara. Magweta aya anonzi akashanda zvakasimba vachimirira vanhu vakadzingwa kupurazi rekuMazowe kuitira kuti mudzimai wemutungamiri wenyika, Amai Grace Mugabe, vachengete mhuka dzesango papurazi iri..
Dare reConCourt rakati mutemo waipikiswa naVaMandevere naVaKadzere vachimirira vasungwa vanoti Fanuel Kamurendo, Shelton Masamba, Wilbert Ndiweni, Tendai Kamurendo naMuzvare Elizabeth Dube, vose vari nhengo dzeMDC inotungamirwa naVaMorgan Tsvangirai, waityora bumbiro remitemo yenyika.
Mutemo uyu waishandiswa nemuchuchisi wenyika kurambidza matare kuburitsa munhu muhusungwa anenge apihwa mukana wekubvisa mari yechibatiso kuitira kuti nyaya yake itongwe achibva kumba.
Mukuru wevatongi vematare edzimhosva, VaGodfrey Chidyausiku, vakati mutemo uyu waifanirwa kubviswa sezvo waityora bumbiro remitemo yenyika.