Zimbabwe yatarisana nemukwidza mukuru apo iri kupinda munhandare yeManuka Oval manheru eMuvhuro mumutambo wayo ne West Indies mumakwikwi eWorld Cup.
Makwikwi emutambo wekiriketi ari kutambirwa mu Canbera ku Australia.
Chikwata cheWest Indies chiri kutanga chiri pamusoro mumutambo uyu mushure mekunge chakarova Zimbabwe mumitambo makumi matatu nemana zvikwata zviviri izvi zvakasangana.
Asi vamwe vanotevera mutambo uyu saVa Andre Matore vanoti Zimbabwe inokwanisa kuwisira pasi West Indies sezvayakaitwa neIreland mumutambo wavo wekutanga mumakundano aya.
Chikwata cheWest Indies chakarohwa neIreland nemawiketsi mana asi chave pachinhanho chechipiri pasi peIndia meshure mekurakasha Pakistan nemaranzi zana nemakumi mashanu.
Zimbabwe iri pachinhanho chechina mushure mekunge South Africa yapunzika zvinotyisa apo yakarohwa neIndia nemaranzi zana nemakumi matatu.
Zimbabwe yakadzika zvinotyisa mumakundano aya mushure mekorova United Arab Emirates nemawiketsi mana yamborohwa neSouth Africa nemaranzi makumi matanhatu nemaviri.
Muongorori wezvemutambo uyu, VaEddison Chikamhi, vanoti matambiro ari kuita Zimbabwe ari kuratidza kuti ine chinangwa chekubudirira kumakundano aya.
Asi Va Matore vanoti hakusisina zvikwata zvidiki kukiriketi mazuva ano.
Pari zvino, Zimbabwe yatamba zvinodadisa mushure mekunge Hamilton Masakadza akaita maranzi makumi masere mumutambo neSouth Africa achiteverwawo naSean Williams uyo akaita maranzi makumi manomwe nematanhatu mumutambo neUnited Arab Emirates.
Brendon Taylor akabudawo nemaranzi makumi mana nemanomwe pamutambo neUAE zvichiratidza kuti Zimbabwe haisi kutarisira kumutambi mumwe chete.
Zvamira zvakadai, chikwata cheWest Indies chiri kushushikana nnematambiro ari kuita Chris Gayle uyo akabuda nemaranzi mana chete pamutambo neIreland.
Uyezve mumwe mutambi, Dwayne Bravo, haasi kutamba neZimbabwe mushure mekukuvara apo vakatamba neIreland.
Asi Andre Russell, uyo akanetsa pamutambo neIreland, anenge arimo achitarisira kutungamira chikwata chake mukukunda.
Kukunda West Indies kunosiya Zimbabwe yave pedyo nekusvika muSuper Eight stage pamwe nekunyorwa mugwaro renhoroondo yemutambo uyu.
Asi vamwe vari kuti zviri nyore kutaura pane kuzviita.