Nhengo ina dzesangano reBulawayo Agenda dzakasungwa neMugovera kuVictoria Falls dzichinzi dzakatyora mutemo wePublic Order and Security Act, POSA, nekuita musangano pasina mvumo yemapurisa dzakabuda muhusungwa mushure mekubhadhara mari yechibatiso.
Nhengo idzi dzinoti Mmeli Dube, Butholezwe Nyathi, Ntobiyezansi Tozana na Thulani Moyo. Dube, Nyathi naTozana. Vose vanoshandira muBulawayo, uye vanzi vabhadhare zana remadhora pamunhu.
Asi VaMoyo, avo vanoshandira muVictoria Falls, vanzi abhadahare madhora makumi mashanu.
Sangano reZimbabwe Lawyers for Human Rights rashora mapurisa nekuramba achityora bumbiro remitemo idzva nekushandisa mutemo wePOSA warati unotyora Section 58 yebumbiro idzva remitemo yenyika.
Chikamu ichi chinoti vanhu vanofanira kusangana pasina kukanganiswa nemapurisa.
Mashoko aya atsinhirwa nesangano reCrisis in Zimbabwe Coalition uye sangano remu America, re Robert F. Kennedy Centre for Justice.
Gweta rinoshanda ne Zimbabwe Lawyers for Human Rights, VaLizwe Jamela, vanoti vana ava vakasungwa vachidzidzisa vanhu nezvekodzero dzavo.