Accessibility links

Breaking News

Makwikwi eNhabvu muAfrica Otanga kuEquatorial Guinea Zimbabwe Isimo


Yaya Toure
Yaya Toure

Makundano enhabvu epamusoro soro muAfrica, eAfrica Cup of Nations, ari kutanga neMugovera muEquatorial Guinea Zimbabwe isina kumirirwa.

Nyaya Ina Michael Kariati
please wait

No media source currently available

0:00 0:04:01 0:00
Pekupinda Napo Kuti Muone Zvamuri Kuda

Veruzhinji vanoti vachange vakagara pamberi pema terevhizheni avo vachiona makwikwi aya ayo achatora mwedzi wese muEquatorial Guinea

Chikwata cheZimbabwe hachiko kumakundano aya mushure mekudamburwa 3-2 neTanzania mumakundano emunzira yekuenda kuEquatorial Guinea.

Vaimbove sachigaro weZifa Northern Region, VaFrancis Zimunya Nyamutsamba, vanoti kusavako kwemaWarriors kunonyadzisa zvikuru uyezve kuri kurwadza vanotevera mutambo uyu muZimbabwe.

Kunyange hazvo Zimbabwe isiri kuEquatorial Guinea, vateveri venhabvu vave kutarisira kuti chimwe chezvikwata zvemunyika dzatakavakidzana nadzo, South Africa kana Zambia, chitore mukombe uyu. s

Mutsigiri wechikwata cheCaps United, VaStanford Kadzviti, vanoti pamberi neChipolopolo chekuZambia, ezvo Zambia iime mhoroondo mumukombe uyu..

Vaimbove murairidzi wevabati vepagedhe remaWarriors, VaNkululeko Dhlamini, vanotiwo nhabvu yasanduka zvikuru muAfrica zvekuti zvikwata zveSouth Africa neZambia zvabatana nezvekuWest Africa pamwe neNorth Africa.

Mutungamiri weZimbabwe Kickboxing Association, VaTony Kamangira, vanotenderanawo nazvo vachiti ivo South Africa inogona kutora mukombe uyu kechipiri mushure mekuutora zvekare muna 1996.

Kunyange hazvo vemuZimbabwe pamwe nevese vekuchamhembe kweAfrica vari kutsigira South Africa neZambia, kune vamwewo vari kuti hatifanire kukanganwa Congo pamwe neDemocratic Republic of Congo idzo zvekare dziri pedyo nesu.

Asi vakati wandei vari kuona kunge mukombe uchaenda kuchimwe chezvikwata zvekuWest Africa, Cameroon, Ghana, Senegal kana Ivory Coast.

Ivory Coast, iyo ichange isina Didier Drogba kekutanga pamakore gumi adarika, ine rutisigiro rwakakura nemhaka yaYaya Toure, uyo anotambira Manchester City yekuEngland.

Asi pese patambwa makundano aya makore manomwe apfuura, chikwata che Ivory Coast change chichitadza kutora mukombe uyu, kaviri kacho chichiroverwa mufainari.

Chimwe chikwata chine rutsigiro rwakadzama ndechemaBlack Stars chekuGhana.

VaFarai Mugoni, avo vanotamba mutambo wetsiva vari muhuremu hwe middleweight, vanoti vachitarisawo zvakaitika munzira yekuenda kuEquatorial Guinea, zviri kuratidza kuti maBlack Stars achanetsa.

Veruzhinji vari kuyambirwa kuti vasakanganwa kuti kune Algeria iyo iri pamusoro soro muAfrica uyezve iri iyo yakasimudza mureza weAfrica kuma 2014 World Cup ayo akaitirwa kuBrazil.

Kunenge kuri kurasika zvekare kutarisira pasi chikwata cheTunisia icho chakatora mukombe uyu kaviri, uyezve chikapedza mitambo yayo yese yemunzira yekuenda kuEquatorial Guinea chisina kubvira chakundwa.

Zvimwe zvikwata zviri kumakundano aya iCape Verde, Guinea, Burkina Faso, Mali, Equatorial Guinea, pamwe ne Gabon.

Chikwata chine mukombe uyu cheNigeria hachina kukwanisa kubudirira kunokwikwidza mushure mekutadza kukunda mugungano rakabudirira South Africa neCongo.

Mitambo ichatambirwa mumaguta mana anoti Mongomo, Bata, Malabo neEbebiyin.

Equatorial Guinea, iyo yakapihwa mukana wekuti makwikwi aya atambirwe munyika iyi mushure mekunge Morocco yakumbira kumbomiswa kwemitambo iyi ichityira chirwere che Ebola munyika mayo, inyika diki ine vanhu mazana manomwe nemakumi mana ezviuru.

XS
SM
MD
LG