Paita ropa rakaipa pakati peMDC neZanu-PF nenyaya yehurongwa hweMDC hwekuparura chirongwa chekupa vanhu nhau dzezvinenge zvichitika munyika pachena kuburikidza nembozharunhare kana nhare dzavo.
Hurongwa uhu hwakaparurwa neChitatu. Asi Zanu-PF inoti izvi hazvisi pamutemo uye kana MDC ichida kuita izvi inofanira kupihwa rezinesi nePOTRAZ.
Vanenge vachida kuteerera nhau idzi vanonzwa mashoko aVaTsvangirai epasvondo uye zvinenge zvichiitika .
Bepanhau reHerald rinoti Econet Wireless inogona kutorerwa rezinesi nenyaya yekudyidzana neMDC ichityora mutemo.
Asi vanoona nezvekuburitswa kwemashoko muEconet, VaRanga Mberi, vanoti Econet hainei nezvematongerwo enyika, uye iri kuita basa rayo zviri pamutemo.
VaNelson Chamisa ndivo mutauriri weMDC. VaChamisa vanoti havadi rezinesi kupakurira vanhu mashoko nekuti haisi redhiyo.
