Accessibility links

Breaking News

Zimbabwe Inopinda Mumakwikwi e2015 Hong Kong Rugby Sevens


Zimbabwe iri kupembera mushure mekunge yabudirira kuenda kumakundano emitambo ye Rugby, e2015 Hong Kongs Sevens.

Izvi zvinotevera kupedza kwakaita chikwata chema Cheetahs chiri pachinhanho chechitatu mumakwikwi eConfederation of African Rugby Sevens ayo aive nezvikwata gumi nezviviri paPrince Edward School muHarare.

Kunyange hazvo mukombe wakatorwa neSouth Africa mushure mekudambura Kenya 38-5, zvikwata zviviri izvi zvaive zvisingarwire rwendo rwekuenda kuHong Kong sezvo zvichitamba mumakundano ari pamusoro.

Izvi zvakabva zvasiya Tunisia neZimbabwe zvichirwira rwendo urwu, Zimbabwe ndokubudirira nekurova kwayakaita Tunisia 41-5.

Makundano eHong Kong Sevens anoshandiswa kutsvaga zvikwata
zvinonotamba muHSBC World Series umo munotashurana zvikwata zvinorura pasi rose izvo zvinosanganisirawo South Africa neKenya.

Zimbabwe yakwanisa zvekare kubudira kusvika kumakundano ekugumisira
munzira yekuenda kuma 2016 Rio de Janeiro Olympic Games ayo achaoona
rugby ichitambwa kekutanga kubvira maOlympic Games atanga kuitwa muParis, France mugore ra 1896.

Mune imwewo nyaya, Dynamos nezuro yakakunda Highlanders 3-2
nemapenareti mushure mekunge Highlanders yambotungamira 2-0, asi Dynamos ikazoniswa mikana mitatu yose, Highlanders ichitadza, ndokutora mukombe weGushungo Victory Cup.

Zvikwata zviviri izvi zvakapedza zviri mangange 0-0 pakapera mutambo, muridzi wepembe akabva ati zvikwata izvi zviende kumapenareti sezvinodiwa nemitemo emukombe uyu.

Zvinhu zvairatidza kufamba zvakanaka kudivi reHighlanders apo Charles
Sibanda naInnocent Mapuranga vakarova mambure kaviri veDynamos, Augustine Mbara neFabrice Mbimba, vachitadza mikana yavo.

Asi zvese zvakazowira pasi apo Highlanders yakatadza kunwisa bhora kana rimwe chete pamikana mitatu yaive yasara, ukuwo Dynamos ichinwisa mabhora ayo ose ari matatu izvo zvakaita kuti Dynamos ikunde Highlanders 3-2.

Asi kunyange yakakundwa, murairdzi we Highlanders, Mark Mathe, anoti chikwata chake chakatamba zvakanaka munguva yemaminetsi makumi mapfumbamwe.

Dynamos yakawana mari inoita iyo zviuru makumi mana nezvishanu zvemadhora, Highlanders ichiwanawo zviuru makumi matatu nezvishanu zvemadhora.

Uyu wave mukombe wechipiri Dynamos ichitora mushure mekutora mukombe weCastle Lager Premier Soccer League mazuva mshoma shoma achangodarika.

Vatsigiri vavo vari kupemberera zvikuru sezviri kuitwa naVa Eddison
Mangwende avo vanoti dai zvaramba zvakadaro.

Mumwe mutsigiri, VaSpencer Madyangove, vanoti vanga vave kutya apo Highlanders yaive yatungamira 2-0.

Zvakamira zvakadai, mutambi wechikwata cheMushowani Stars, Zivanai Mhanda, uyo akasarudzwa kuve ndiye soccer star of the year wenhabvu yepasi yeZifa Northern Region Division One apihwa mukana wekuenda kuJapan kunoonekwa kuti anokwanisa kutamba nhabvu yepamusoro munyika iyoyi here.

Mhanda, uyo akapihwa motokari yerudzi rweToyota Corolla itsva mukusarudzwa uku anoti ari kutarisira kuve mutambi wekutanga muZimbabwe kukwanisa kubudirira kunotamba nhabvu munyika iyi.

Mhanda anoti ari kufara zvisingaite nekuwana mukawa uyu

Mumitambo yeBarclays English Premiership, Chelsea yaramba kudyika mushure mekuita mangenge 0-0 neSunderland neMugovera. Ukuwo Southampton yakadamburwa 3-0 neManchester City.

Asi kwaive kusina kumira zvakanaka muHawthorns Stadium umo vatsigiri
veArsenal vaisimudza zvinyorwa zvekuti murairidzi wavo, Arsene Wenger, asiye basa kunyange hazvo chikwata chake chaive chakunda West Ham 1-0.

Asi Wenger anoti haasi kuteerera izvi achiti iye haasi kuda kumbotaura nezvevatsigiri vari kuti asiye basa.

Panguva iyo Wenger aishungurudzwa zvimwe chetezvo hazvisi kutaurwa
nezvemurairidzi weManchester United, Louis Van Gaal, uyo ari kupemberera kukunda kwechikwata chake.

MaRed Devils akaramba ari pachinhanho chechitatu mushure mekurova Hull
City 3-0 izvo zvavasiya vaine mapoinzi makumi maviri nemaviri.

Mimwe mitambo yakapera yakamira seizvi.

Liverpool 1 Stoke 0
Burnley 1 Aston Villa 1
QPR 3 Leicester 2
Swansea1 Crystal Palace 1
West Ham 1 Newcastle 0

Nyaya Ina Michael Kariati
please wait

No media source currently available

0:00 0:05:27 0:00
Pekupinda Napo Kuti Muone Zvamuri Kuda

XS
SM
MD
LG