Gurukota rinoona nezvekushanya kwevanhu munyika, Va Walter Muzembi, vanoti huwandu hwevashanyi huri kutarisirwa kukwira nezvikamu zvinomwe kubva muzana munguva inotevera kunyange hazvo nyika ichiri yakatarisana nematambudziko akasiyana siyana.
VaMuzembi vakataura izvi pamhemberero dze National Tourism Awards idzo dzakaitwa kuVictoria Falls.
Nyanzvi munyaya dzehupfumi, Va Godfrey Kanyenze, avo vanoshanda ne Labour and Economic Development Research Institute of Zimbabwe, vanoti kunyange hazvo pane shanduko shoma pahuwandu hwevashanyi munyika, pachine zvizhinji zvinoda kugadziriswa kuitira kuti huwandu uhu hunyatsobatsira hupfumi hwenyika.
VaKanyenze vanoti hurumende inofanirwa kugadzirisa bazi rinoona nezvekuburitswa kwemafambiro ezviri kuita zvinhu munyika kuitira kuti veruzhinji nedzimwe nhanzvi dzione pachena mamiriro chaiwo akaita hupfumi hwenyika.
