Nyaya yemhirizhonga inonzi yava kutangazve munyika, kuburikidza nemashoko anoti bato reZanu PF rakavhurazve makamba ekushungurudzira vanhu mumatunhu akawanda emunyika.
Asi bato iri rinoti manyepo kuti ratanga nyaya yekurova vanhu mumakamba.
Vamwe vashandi vehurumende vari pakuramwa mabasa, zvikuru varairidzi, vanonzi vari kuoneswa chitsvuku nevatsigiri veZanu PF pamwe nevakarwa hondo, avo vari kuvamanikidza kushanda uye kutarira nguva yekuti vanenge vasina kuteerera kurudziro iyi vabve pazvikoro izvi.
Nyanzvi munyaya dzezvematongerwo enyika dzinoti dambudziko iri riri kunyuka zvakare nechikonzero chekuti hurumende yemubatanidzwa haina kugadzirisa nyaya yekupodzwa kwemaronda uye kuregererana.
Mukutarisa nyaya nyanzvi mune zvematongerwo enyika, uye vari Programs Manager weCrisis in Zimbabwe Coalition, VaPedzisai Ruhanya, pamwe nemutungamiri wePTUZ, VaTakavafira Zhou, vanoti hurumende yemubatanidzwa ndiyo iri kutadza kugadzirisa nyaye yekupodza maronda.
