Kongiresi yebato reMDC-Renewal Team yakatanga muHarare neChitatu pachiitwa misangano yeNational Management Committee, National Working Council neGeneral Council.
Musangano wemazuva matatu uyu uri kuitirwa kuCity Sports Centre pasi pedingindira rekuti kudzora Zimbabwe mugwara kana kuti “Reclaiming Zimbabwe”.
Bato iri riri kutarisirwa kusarudza vatungamiri vatsva uye kuparura zita itsva. Vaimbova gurukota rezvehupfumi VaTendai Biti ndivo vari kutarisirwa kusarudzwa kuti vatungamire bato iri vachitevedzerwa naVaSamuel Sipepa Nkomo.
Mutauriri webato iri VaJacob Mafume vanotiwo pane magwara avachaparura anosanganisa rezvehupfumi rinonzi Holistic Programme for Economic Transformation (HOPE) uye rezvematongerwo enyika re Agenda for the Rehabilitation and Restoration of Electoral Sustainability (ARREST).
VaBiti nevamwe vavo vakabuda mubato rinopikisa reMDC mushure mekutadza kuwirirana nemutungamiri webato iri VaMorgan Tsvangirai.
Your browser doesn’t support HTML5
Hurukuro naVaJacob Mafume