Rimwe sangano revarimiri, reZimbabwe Commercial Farmers’ Union, rinoti kukwidzwa kwemitengo yembeu yechibage nevanouchika mbeu kuchaita kuti varimi vakawanda varasike muhurongwa hwavo hwavanga vaita hwemwaka uno.
Mutungamiri wesangano iri, VaWonder Chabikwa, vanoti vasati vatora danho iri vanouchika mbeu ava vaifanirwawo kutanga vambogara pasi nevamwe vanoitawo zvekurima votaurirana.
Svondo rino varimi vazhinji vanonzi vakashamisika kuwana mitengo yembeu yechibage yakwidzwa nezvikamu zvingada kusvika kumakumi matatu.
Mutengo we 25 kg unonzi wakwira kubva pakati pe$57.00 ne$96.00 kuenda pakati pe$68.00 ne$113.00, zvichienderana nerudzi rwechibage.
Makirogiramu gumi ave kuita mitengo iri pakati $27.50 ne $31.00 uchibva pakati pe$21.00 ne$24.00.
Tsapo yemakirogiramu mashanu inonzi yave kuitawo madhora ari pakati pegumi nematatu nemadhora gumi nemashanu.
Tsapo yemakirogiramu maviri inonziwo yave kutengeswa nemari iri pakati pemadhora mashanu nemadhora manomwe.
VaChabikwa vanoti kunze kwedambudziko rekukwira kwembeu, zvizhinji zvinodiwa nevarimi zvinonzi zviri kuwanikwa pamisika.
Fotereza inonzi iri kuwanikwawo nemitengo inoti $34.00 patsaga reyepasi, ne$38.00 patsaga refotereza yepamusoro, mitengo iri kunzi nevamwe varimi iri pamusoro zvakare gore rino.
Hurumende inonzi yakatengawo fotereza yakawanda kubva kunze kwenyika kuitira kutsigira iri kugadzirwa munyika.
Your browser doesn’t support HTML5
Hurukuro naVaWonder Chabikwa