Varikukwikwidza musarudzo dzedare reparamende vakazvimirira kuHurungwe West, VaTemba VaMliswa vakwira kudare resarudzo reElectoral Court vachiti sarudzo dzekuHurungwe West dzimbomira kuitwa nenyaya yemhirizhonga.
VaMliswa vaendesawo kudare gurukota rinona nezvematunhu vachiona nezvekufambiswa kwemabasa muZanu-PF VaIgnatious Chombo uye vari kumiririra Zanu-PF, musarudzo idzi, VaKeith Guzah.
VaMliswa vanoti vaviri ava vari kukonzera mhirizhonga kuHurungwe West uye vanoti vane humbowo hwacho. Hatina kukwanisa kubata VaChombo asi VaGuzah vati havana chekutaura panyaya iyi. Gweta raVaMliswa, VaMsindo Hungwe vanoti dare harifanire kurega sarudzo dzichiitwa paine mhirizhonga.
Your browser doesn’t support HTML5
Hurukuro naVaMsindo Hungwe
Zvichakadaro VaMliswa avo vakasungwa nemapurisa neChipiri pedyo neMagunje vakaburitswa muhusungwa neChitatu. Vainge vasungwa vachipomerwa mhosva yekutyora mitemo yesarudzo nekubvarura mapepa ekuzvishambadza evavari kukwikwidzana navo VaGuzah uye kurova mumwe musoja.
Your browser doesn’t support HTML5
Hurukuro naVaTemba Mliswa
Asi dare ramejastiriti rati kana mapurisa achida kuuya nawo kudare anogona kushandisa masamanisi. Masangano akaita seZimbabwe Peace Project neZimbabwe Election Support Network ari kuburitsawo magwaro anoratidza kuti kuHurungwe West kwaberekera ingwe.