Vaimbova munyori wemabasa muZanu PF, VaDidymus Mutasa, vanoti mutungamiri wenyika, VaRobert Mugabe, vari kuramba kuita musangano navo.
VaMutasa vanoti vanyorera tsamba dzakawanda VaMugabe semutungamiri webato ravo vachida kuti vataurirane pagakava riripo rakakonzera kuti pave nekupesana mubato.
Hatina kukwanisa kubata mutauriri waVaMugabe VaGeorge Charamba kuti tinzwe divi ravo sezvo nharembozha yavo yange isiri kudairwa.
VaMutasa vari kuramba kutambira zvakabuda mukongiresi yebato ravo yakaitwa muna Zvita vachiti zvakaitwa pakongiresi iyi zviri kunze kwebumbiro rebato.
VaMugabe vakadzinga muhurumende VaMutasa nevaimbove mutevedzeri wemutungamiri wenyika, Amai Joice Mujuru, nevamwe vakuru mubato, vachivapomera mhosva yekuda kuvapandukira mubato.
VaMutasa naVaMugabe vashanda vose muZanu PF kwemakore anodarika makumi mana.
Studio7 haina kukwanisa kunzwa kumutauriri weZanu PF, VaSimon Khaya Moyo, kanawo kumutauriri waVaMugabe muhurumende, VaGeorge Charamba, sezvo nharembozha dzavo dzanga dzisingadairwe.
Your browser doesn’t support HTML5
Hurukuro naVaDidymus Mutasa