Mukuru mubazi rinoona nezvenjodzi reCivil Protection Unit VaNathan Nkomo vanoti nhasi vabatana negurukota rinoona nezvedunhu reManicaland Doctor Ellen Gwaradzimba kuenda panzvimbo yakaitikira tsaona yakauraya vanhu gumi nevatanhatu nezuro.
Izvi zvakatevera kubonderana kwebazi reGeneral Bande nerori pedyo nemusha wekwaShamu mumugwagwa weHarare-Mutare nezuro.
VaNkomo vati vanhu gumi vakashaya vatokwanisa kuzivikanwa uye hama dzavo dzepedyo dzaziviswa. Vanhu gumi nevatatu vakafira pakaitikira njodzi vamwe vatatu vakafira kuchipatara.
Makambani akaita seNyaradzo, Doves neEconet anonzi ari kubatsira hama dzevakafa nekukuvara munjodzi iyi. VaNkomo vativo hurumende nevemamwe makambani vari kubatsira vakawirwa netsaona ava.
Your browser doesn’t support HTML5
Hurukuro naVaNathan Nkomo
Zvichakadaro, mutungamiri webato guru rinopikisa reMDC Vanelson chamisa vatumirawo mashoko enyaradzo kumhuri dzakafirwa uye dzine hama dzakakuvara mutsaona iyi.
Your browser doesn’t support HTML5
Hurukuro naVaNelson Chamisa