Sangano rinorwisana nehuori munyika re Coalition Against Corruption, CAG, rinoti komiti yaitambira rubatsiro rwevanhu vakasara vasina pekugara zvichitevera mafashamu emvura ku Chingwizi inofanirwa kuferefetwa sezvo sangano iri richiti rubatsiro rwakabviswa neveruzhinji haruna kusvika kuvanhu ava.
Mutungamiri we CAG, Va Terry Mutsvanga, vanoti sangano ravo harisi kufara nemafambisirwo akaitwa rubatsiro rwakabviswa neveruzhinji vachibatsira vagari veku Chingwizi kuMasvingo.
Va Mutsvanga vaudza Studio 7 kuti vari kushushikana zvikuru nemari inoita zviuru mazana mashanu zvemadhora zvakabviswa nehurumende ye China yavanoti yakafambiswa zvisina tsarukano uku vagarI veku Chingwizi vachinhonga svosve nemuromo.
Va Mutsvanga vakurudzira paramende kuti iwumbe komiti yekuferefeta komiti yakaumbwa nehurumende kuti itambire rubatsiro rwevanhu veku Chingwizi iyo yaitungamirwa negurukota rehurumende rinomirira dunhu re Masvingo, Va Kudakwashe Bhasikiti.
Munguva iyo vagarI veku Chingwizi vaida rubatsiro nekukasika, Va Bhasikiti vanonzi vairamba kuti vanoda kubatsira vapinde mu Chingwizi vasina kuvapa mvumo.
Sangano remgweta anorwira kodzero dzevanhu, re Zimbabwe Lawyers for Human Rights, ZLHR, rinoti riri kushushikana zvikuru nekushaya kuri kuita vagari veku Chingwizi chikafu.
Vanowona nezvekuburitswa kwemashoko mu ZLHR, Va Kumbirai Mafunda, vanoti kushaya kuri kuita vagari veku Chingwizi ava kwava kutyora kodzero dzavo dziri mubumbiro remitemo yenyika.
Zvichakadai, Va Bhasikiti vaudza Studio 7 parunhare kuti havana dambudziko rokuti paramende iwumbe komiti inovaferefeta vachiti izvi zvinotobatsira kuchenura zita ravo.