Accessibility links

Breaking News

Zvibodzwa Zvonaya Kunge Mvura yeMubvumbi Mumakwikwi eChibuku Super Cup


Makundano enhabvu akadzoka zvine mutsindomukupera kwesvondo zvibodzwa zvichinaya semvura yezhizha.

Zvibodzwa makumi maviri nezvishanu zvakakandwa mumitambo mipfumbamwe iyo yakasimudzira kutanga kwemakundano eChibuku Super Cup nemusi weMugovera neSvondo

FC Platinum ndiyo yakatungamira mukukanda zvibodzwa izvi mushure mekurakasha Hwahwa 6-0.

Zvitatu zvezvibodzwa zveKugona Kunenge Kudada zvakabva kuna Rodwell Chinyengetere uyo akambotora mukombe weSoccer Star kaviri asati aenda kunoedza mhanza kuSouth Africa.

Asi Mutambi ari kungotaurwa nezvake kwese kwese ndiDenver Mukamba weNgezi Platinum Stars uyo akaita zvidavado uyezve nekunwisa zvibodzwa zviviri apo vakakunda Triangle 3-1.

Mugohwo wezvibodzwa hauna kuperera paFC Platinum neNgezi asi wakawedzerwa neBlack Rhinos iyo yakanodambura Tenax 4-1 muSakubva Stadium kwaMutare.

Zvikwata izvi zvakabatana mukutora mapoinzi ese matatu neHighlanders iyo yakarova Bulawayo Chiefs 1-0 ne Chicken Inn iyo yakakunda Bulawayo City 2-0.

Cranbourne Bullets iyo ichangopinda muPremier Soccer League yakasimudzirawo mitambo yayo nemufaro nekurova Manica Diamonds 1-0.

Asi Dynamos neCaps United hadzina mufaro mushure mekunge Dembare yaita 0-0 neHerentals nezuro ukuwo Caps United ichipedza iri 2-2 neYadah nemusi weMugovera.

Murairidzi weCaps United Darlington Dodo arikubvuma kuti chikwata chake hachina kutamba sezvaaitarisira.

Vese vakaona Dynamos ichitamba vanoti chikwata ichi chaitatarrika vatsigiri veDembare vakawanda vachiti chinoda kugadziriswa zvakasimba.

Asi murairidzi weHerentals Kumbirai Mutiwekuziva arikufara achiti kutora poindi paDynamos kunovapa manyuku-nyuku pamitambo inotevera.

Harare City yakaitawo mangange 1-1 neZPC Kariba.

Vateveri vemutambo wenhabvu vaiona mitambo iyi pamatelevhezheni nepadandemutande.

Vashoma vakapinda mudzinhandare ndeavo vakaita raki rekupihwa basa rekunhonga mabhora aibuda panze.

Basa iri raiwanzopihwa vana vadiki asi rave kurwirwawo nevakuru.

Zvikwata zviviri zvichapedza zviri pamusoro mugungano rega rega muHarare, Bulawayo, Mutare neZvishavane, ndizvo zvinopinda muma Kota fainari. Mimwe mitambo iriko svondo rino.

Nyaya Ina Michael Kariati
please wait

No media source currently available

0:00 0:03:47 0:00
Pekupinda Napo Kuti Muone Zvamuri Kuda


Facebook Forum

XS
SM
MD
LG