Sangano reZimRights rinoti riri kushushikana nekushayikwa kuri kuita majekiseni eBCG, kana kuti Bacillus Calmette-Gurin anopihwa vana kana vachangobva kusunungukwa.
ZimRights inoti yakaita ongororo yayo mushure mekunge madzimai mazhinji ari kusununguka mudunhu reManicaland kusanganisirawo paMutare Provincial Hospital avaudza kuti vanga vachiendeswa kumba mushure mekusununguka vana vasina kubaiwa majekiseni aya anodzvivirira zvirwere zvakaita serurindi kana kuti TB.
Dunhu reManicaland rese rinonzi rine dambudziko rekushayikwa kwemajekiseni eBCG zvekuti kamba yemasoja ye Three Brigade inonzi yakatozopindira ikashandisa majekiseni ayo kubaya vamwe vana vaibva kuMutare Provincial Hospital.
Hatina kukwanisa kubata vakuru vezvehutano mudunhu reManicaland, kanawo gurukota rezvehutano, Dr Henry Madzorera, kuti tinzwe pamire hurumende.
Muzvare Olivia Gumbo ndivo Programs Cordinator weZimRights. Vati sangano ravo rinoda kuti hurumende igadzirise nyaya iyi nechimbi chimbi.
Sachigaro weZimbabwe Doctors for Human Rights, Dr Douglas Gwatidzo, vanoti vana vese vanofanira kubaiwa BCG nguwa dzose.
