Caps United ndiyo yave pamusoro pemakwikwi eCastle Lager Premier Soccer League panguva iyo Dynamos yakaonekana nevatsigiri vavo vakashaya munjodzi yemumugwagwa vachikunda vachiti mutambo uyu wainge wakanangana nekurangarira nekunyevenutsa mweya yevafi.
Makundano eCastle Lager Premier Soccer League ave nemutungamiri mutsva mushure mekunge Caps United nemusi weSvondo yarova Mutare City Rovers 2-0 ndokuenda panhongonya ichisiya ZPC Kariba iri pachidanho chechipiri nenyaya yekuti yakanwisa zvibodzwa zvakawanda.
Zvikwata zviviri izvi zvine maponzi makumi maviri nerimwechete mushure mekunge ZPC Kariba yarova Tsholotsho Pirates 1-0 neMugovera, apo mutambo weCaps United neMutare City Rovers waive usati watambwa.
Asi nyaya irikutaurwa nezvayo munhabvu kwese kwese ndeiyo yakaitika muRufaro Stadium apo chikwata cheDynamos chakadambura Ngezi Platinum Stars 2-0 mumutambo uyo vaiyeuka vatsigiri vavo vasere avo vakashaika munjodzi yemotokari vachienda kunoona chikwata ichi chichitamba neChapungu kuGweru svondo rapera
Zvibodzwa zvakabva kuna Augustine Mbara na Roderick Mutuma zvakasimudza nhandare yese mukupemberera vatsigiri vavo vakashaya avo vaive nemifananidzo yaive yakaiswa pamapepa aive akanamirwa munhandare yese.
Ocean Mushure uyo akatamba semunhu akasvikirwa anoti vakapedza svondo rese vachitaurirana kuti vaifanira kukunda mumutambo uyu kuti vafadze vatsigiri vavo vakavasiiya achiwedzera iye kuti varikutarisira kukunda mumitambo yavo irikutevera kuti vavacheme zvakakwana.
Mumwe mutsigiri wechikwata chinemukurumbira ichi VaZebron Muzvidziwa vanoti varikutosvimha musodzi nekufara nezvakaitwa nechikwata chavo mukuyeuka zvine mutsindo vakavasiya.
Asi mafaro ezuva rese aya anga avekukanganiswa naSteven Alimenda naRoderick Mutuma avo vange vave kuda kukandirana zvibhakera pamberi pemhomho yevanhu vachirwirra kurova mugadzikirwa kana kuti free kick.
Mushure adira mvura nyaya iyi achiti iye ndezvenhabvu sezvo vese vaida kunwisa zvibodzwa musi wanga wakakosha uyu.
Mushure anoti kunyange hazvo vakasiiwa nemapoinzi manomwe nechikwata chirikutungamira, makwikwi achiripo, zvekuti anofunga kuti vakaramba vachitamba matambiro avarikuita aya vanokwanisa kutora mukombe weligi mukupera kwemitambo yemwaka uno.
Mumitambo mina yadarika, Dynamos yanhonga mapoinzi mapfumbamwe mushure mekukunda mumitambo mitatu nekukundwa mumutambo mumwechete.
Mukukundwa kawavakaitwa neDynamos, Ngezi Platinum Stars yadzika pasi zvekuti yave pazvikwata zvina zvakatarisana nenjodzi yekuwira muDivision One mukupera kwegore rino.
Asi mutevedzeri wechikwata ichi Klifton Kadurira haasi kunyanyovhunduka achiti iye mitambo ichiripo zvekuti vanokwanisa kugadzirisa zvinhu zvavo vakakwira kumusoro kwetafura zvekare.
Highlanders iri kuramba yakati kwata nezvikwata zviri kutungamira mushure mekunge zvibodzwa zvakabva kunaBruce Kangwa naSimon Munawa zvakavapa mapoinzi matatu varova How Mine 2-0.
Bosso iri pachinhanho chechitatu, poindi imwechete pasi peCaps United neZPC Kariba asi inokwanisa kuenda pamusoro vakatamba nekukunda mumutambo wavasati vatamba neChicken Inn.
Moses Chunga ari kuenderera mberi nekurura mushure mekunge Harare City yakafamba nzendo refu yakananga kuBulawayo ndokunokunda Bulawayo City 2-0.
Asi Chunga achanyatsoonekwa masimba ake svondo rino apo chikwata chake chirikusangana neDynamos neMugovera.
Mitambo yese yakapera seizvi………
Mugovera
ZPC Kariba 1 Tsholotsho Pirates 0
Bulawayo City 0 Harare City 2
Svondo
Triangle 0 Hwange 1
Dynamos 2 Ngezi Platinum 0
Highlanders 2 How Mine 0
Mutare City 0 Caps United 2
Border Strikers 0 Chapungu 2
Katambwa mitambo gumi, zvikwata zvina zviri pamusoro soro ndeizvi…
Caps United 21 points
ZPC Kariba 21 points
Highlanders 20 points
FC Platinum 20 points
Zvikwata zvina zviri pasi pasi ndeizvi……..
Ngezi Platinum Stars 8 points
Tsholotsho Pirates 8 points
Mutare City Rovers 6 points
Border Strikers 3 points.
