Vatungamiri vehurumende, masangano eUnited Nations, vakuru vemabhizimisi nevamiriri vemasangano akazvimirira oga zviuru zviviri vange vari kumusangano wemazuva matatu kuGeneva, Switerland kutanga nemusi weMuvhuro.
Uyu musango wekutanga weGlobal Refugee Forum uyo wakanangana nekutarisa matambudziko anosangana nevanhu vari muhupoteri kana kuti vanotiza misha yavo nekuda kwehondo kana kushungurudzwa.
Vanhu vari muhupoteri vanosvika mamiriyoni makumi maviri nemashanu vari muhupoteri kochiti vamwe mamiriyoni makumi mashanu nemashanu vakatiza misha yavo munyika dzavo nekuda kwekusagadzikana munyika dzavo.
Gurukota rezvevashandi nekugarisana zvakanaka kwevanhu, Muzvinafundo Paul Mavima, avo vakatungamira chikwata cheZimbabwe kumusangano uyu, vanoti nyika ine vanhu vakawanda vakapotera kubva kuRwanda, Democratic Republic of the Congo, Mozambique neEthiopia vanochengetwa paTongogara Refugee Camp kuManicaland.
VaMavima vanoti vakakumbira rubatsiro rwemari pamusangano uyu kuitira kuti vakwanise kuvakira vapoteri zvikoro uye kirinika vachiti izvi zvinobatsira vanhu vemunharaunda.
Facebook Forum