Nhengo nhatu dzesangano reRural Teachers Union Of Zimbabwe dzamiswa pamberi pedare kuMbare neChipiri mushure mekuchengetedzwa nemapurisa neMuvhuro kukamba yemapurisa yekuKuwadzana 2.
Vatatu ava vange vachipomerwa mhosva yekuramba kusungwa. Mutungamiri wesangano iri VaObert Masaraure , nedzimwe nhengo dzesangano iri VaPride Gawa naVaPride Mukono vanzi vadzoke kudare musi wa 14 na15 Ndira gore rinouya.
Nhengo idzi dzinonzi dzakasungwa mushure mekunge dzaita musangano kuKuwadzana dzichipomerwa mhosva yekuronga kuratidzira musi wa 4 mwedzi unouya nenyaya yekusafara kwavo nekunonoka kwehurumende kupa varairidzi mari dzemihoro nemabhonasi.
Munyori mukuru musangano iri VaRobson Chere, vanoti vatatu ava varohwa zvakaipisisa panguva iyo vakasungwa uye pavakazopinda muhusungwa.
"Zvinonetsa ndezvekuti vatatu ava vaka shungurudzwa uye vakarohwa zvekuti mumwe wavo VaPride Mukono akatotyorwa mbabvu uye parizvino arikuwongororwa navanachiremba. Hatiziti kuti muneremangwana zvinenge zvakamira seyi," VaChere vaudza Studio7.
Kuchengetedzwa nekumiswa pamberi pedare kwevatatu ava kunouya panguva iyo vashandi vazhinji vehurumende vasati vawana mabhonasi uye mari dzavo dzemihoro.
Varairidzi, masoja nemauto vakabhadharwa neChipiri asi vamwe vakaita savana mukoti nemadhokotera vainge vasati vabhadharwa.
