Vatsigiri venhabvu vatarisana nemamwe machikichori ebattle for Zimbabwe makundano e2015 Castle Lager Premier Soccer League asati asvika kwamvura yacheka makumbo.
Nhandare yeBarbourfields Stadium ndiyo inenge iine machikichori enhabvu aya apo Bosso neDeMbare dzichange dzichitatsurana zvekare gore rino mushure mekunge zvikwata zvinemukurumbira izvi zvapihwa mukana wekusangana mumakwikwi ema semi fainari emukombe weNetone Easycall Cup.
Izvi zvinotevera kubatanidzwa kwaitwa zvikwata izvi nemusi weChipiri zvakasiya mamwe machikichori emutambo pakati pechikwata chichangotora mukombe weCastle Lager Premier Soccer League cheChicken Inn neCaps United.
VaRodwell Thabe vekuPremier Soccer League vati mitambo iyi yese ichatambirwa munhandare yeBarbourfields musi wa 5 na 6 Zvita vachiwedzera ivo kuti vePSL havasati varonga kuti mutambo uchatanga ndeupi.
Zvichakadaro, mubati wehomwe muchikwata cheDynamos VaWebster Marechera vanoti makundano aya ndiwo asara zvekuti varikutarisira kusvika mufainari nekutorawo kamari kuti vabatsirike.
Mutevedzeri wasachigaro weHighlanders VaMgcini Mpofu vabvuma kuti mutambo uyu unenge wakaoma zvikuru asi vachivimbisa kuti chikwata chavo chirikuuya chakaveza mapfumo.
Chicken Inn yanga isina mumiriri pamabiko aitwa eEasycall Cup aya sezvo varikupemberera kutora mukombe weCastle Lager Premier Soccer.
Asi muongorori wezvemutambo wenhabvu vaEvans Magwere vanoti vachiona matambiro anga achiita chikwata ichi gore rino apo vaisangana neCaps United vanoona kunge Chicken Inn iri pamberi.
Pamutambo weDynamos neHighlanders vanoti mutambo uyu wakaoma zvikuru asi vachiwedzera ivo kuti nekudhererwa kwakaitwa Bosso neDembare makore ano hapana zvirikusanduka.
Masemi fainari aya arikubva ateverwa svondo rinotevera nefainari iyo ichaitwa musi was 13 Zvita munhadandare ichazoziviswa.
Vachakunda mumakundano aya vachawana mari inoita iyo zviuru makumi masere. Vachakundwa vacho vachiwanawo zviuru makumi mashanu.
Vachakundwa muma semi fainari vachawana ivo zviuru makumi matatu. Izvi zvirikureva kuti zvikwata zvina zvichiri kukwikwidza zvinotove ne zviuru makumi mashanu muhomwe.
