Mutungamiri weFIFA VaSepp Blatter neChipiri vakasiya basa apo sangano renhabvu iri rakatarisana nenyaya dzehuori.
Vachitarura nevatori venhau VaBlatter vakati vainge vafunga zvakadzama nezvehupenyu hwavo vakaona zvakakodzera kuti vasiye basa. VaBlatter vanoti vachangomirira kuti kuti paitwe sarudzo dzekuvatsiva vobva vaenda zvavo pamudyandigere.
Nyanzvi munyaya dzenhabvu dzinoti sarudzo idzi dzinogona kuitwa pakati pemwedzi waZvita na Kurume.
VaBlatter avo vane makore makumi manomwe nemapfumbamwe vakasarudzwa zvekare kuti vatungamire FIFA vachipika kuti havaizosiya chigaro ichi. Vakakunda Prince Ali bin al-Hussein veku Jordan.
Asi nyaya yekuongororwa kwemabasa eFIFA nebazi reFederal Bureau of Investigation nemapurisa emuSwitezerland zvinonzi zvinenge zvinge zvoremera VaBlatter.
Vamwe vakuru veFIFA vakatomanikidzwa kusiya basa vachinzi vaipihwa chioko muhomwe nenyika dzinenge dzichida kupihwa mukana wekuti mukombe weWorld Cup utambirwe munyika idzi.