Chikwata chema Mighty Warriors chiri pamutambara kede nemafaro panguva iyo mutevedzeri wemurairidzi weDynamos, Gift Muzadzi, akamira panguva yakaoma.
Kusati kwapera gore maMighty Warriors abudirira kuenda kuma 2016 Rio Olympic Games, chikwata chenhabvu yevanhukadzi ichi chawedzera imwe peji munhoroondo yekubudira kwavo mushure mekorova Zambia 3-2 nezuro ndokubudirira kuenda kuma 2016 Africa Women’s Championships.
Chikwata ichi chabatana nezvimwe zvikwata zvenhabvu zvevanhukadzi gumi nezvishanu izvo zvichange zviri kumakundano akakosha eAfrica Women’s Championships aya kuCameroon kubva musi wa 19 Mbudzi kusvika 3 Zvita mushure mekukunda Zambia 4-2 mumitambo miviri.
Mutungamiri weZimbabwe Football Association, VaPhillip Chiyangwa, vavimbisa kuitira vatambi ava mabiko uyezve nekuvatenda zvine mutsindo mukusimudzira mureza weZimbabwe.
Asi panguva iyo maMighty Warriors ari kupemebrera apo vari munzira kudzoka kubva kuZambia, mumusha weDynamos mune mheremhere mushure mekunge vatsigiri vechikwata ichi vakamuka chibhenenga mukupera kwesvondo vachishevedzera kuti mutevedzeri wemurairidzi wavo, Gift Muzadzi, assiiswe basa.
Vatsigiri ava vari kupomera Muzadzi mhosva yekufurira vatambi veDembare kuti vasatambe nemhazvo kuitira kuti vadzingise Paolo Jorge Silva basa uyo akatorwa kuPorugal kuti arariridze chikwata chine mukurumbira ichi.
Muzadzi naSilva havawirirane zvachose zvekuti vakambobatana batana kaviri apo chikwata ichi chaigadzirira mitambo asi vanotevera chikwata ichi vaiimba vachiti pamberi naSilva.
Izvi zvakaitika mushure mekunge Dynamos yaita mangange 0-0 neTriangle mumutambo veruzhinji vanofunga kuti Dynamos yaifanira kuve yakakunda asi vatambi vavo vaive vasingatambe nemoyo wese sekutaura kwaVa Colin Dhivhala Panyamba
Zvakamira zvakadai, murairidzi weTriangle, David Mandigora, uyo akadzingwa basa neDynamos mwaka wapera, ari kufara nematambiro akaita chikwata chake achiti iye kunyange vaida mapoinzi matatu, poindi imwechete kunze kwemusha yakakosha.
Maperero akaita mutambo uyu asiya Dynamos iine poindi imwe chete mumitambo miviri Triangle yacho iine mapoinzi mana mumitambo miviri zvekare.
Asi Dynamos yacho iri kusaririra sezvo zvimwe zvikwata zviri kutora mapoinzi zvichienda sezvakaitwa nechikwata cheChicken Inn icho chakarova Boarder Strikers 1-0 ndokuenda pamusoro peCastle Lager Premier Soccer League table.
Chibodzwa chakanwiswa naDivine Lunga chasiya maGame Cocks ave nemapoinzi matanhatu mumitambo miviri uyezve pamusoro peFC Platinum nezvibodzwa iyo ine mapoinzi matanhatu zvekare mushure mekurova Highlanders 2-1.
Kunyange hazvo Highlanders yakaedza kudzoka mumutambo nechibodzwa chakabva kuna Rahman Kutsanzira mapoinzi aive aenda nePlatinum mushure mekunge Walter Musona naObey Chirwa vakarova mambure mutambo uchangotanga.
Zvakamira zvakadai, Caps United yakatadza kunouya nemapoinzi matatu apo yakanoita mangange 1-1 neNgezi Platinum Stars izvi zvichiuya zura rimwe chete mushure mekunge How Mine yaive yarova ZPC Kariba.
Tsholotsho Pirates yakarova Bulawayo City 1-0 pamutambo wezvikwata zvinotambira muBulawayo panguva imwe cheteyo Chapungu yakadamburawo Hwange 2-0.
Zvimwe zvikwata zvisati zvapinda munhandare, Harare City yaive yaraksaha Mutare City 4-2 neChishanu.
Mutare City yacho, pamwe neHwange ndidzo dziri pasi pasi pehurongwa hweCastle Lager Premier Soccer League vasina kana poindi imwe chete mumitambo miviri.
