Vatsigiri venhabvu vari kukurudzira Caps United kuti inofanira kutenga vatambi vatsva kana ichitarisira kuita zvakanaka muCaf Champions League.
Kunyange hazvo Caps United yakatora mukombe wePSL sezvaisatarisirwa nevakawanda, vaongorori vemutambo wenhabvu vanoti chikwata ichi chinofanira kutenga vatambi vatsva kana chichida kuita zvakanaka muCaf Champions League.
Muongorori wenhabvu, VaCephas Kaseke, vanoti Caps United haina kunyatsosimba zvekuti inoda vatambi vatsva vakati wandei kana ichirota zvekuita mashiripiti mumakundano emuAfrica aya.
Muridzi wemaGreen Machine, VaFarai Jere, vakataurira ruzhinji rweZimbabwe kuti chinangwa chavo ndechekutora mukombe wemuAfrica uyu sezvakaitwa neMamelodi Sundowns yekuSouth Africa gore rino.
Asi mutsigiri weCaps United, VaTongesai Hamadziripi, vanoti kutamba muAfrica kwakasiyana nekutamba neBorder Strikers, Tsholotsho Pirates, Chapungu, kana Mutare City Rovers vachiti ivo maGreen Machine ari kuda vatambi vatsva vatatu kana vana kuti igadzikane.
Mumwe muteveri wenhabvu asi achifarira chikwata cheDynamos, VaRichard Musikavanhu, vanoti semaonero avo Caps United haidi shanduko yakakurisa asi vachibvuma havo kuti panoda vamwe vatambi.
Murairidzi weCaps United, Lloyd Chitembwe, anotenderana neveruzhinji kuti chikwata chake chinoda kusimbiswa asi achiti iye nyaya iyi achaona nezvayo kana abva kuzororo rekisimisi.
Ikozvino, Chitembwe anoti inguva yekupemberera zvavakakohwa mwaka uchangopera.
Pamusoro pekutora mukombe wePSL, Chitembwe ndiye zvekare akatora mukombe wemurairidzi akagona basa kukunda vese, Coach of the Year.
Kunze kweCaps United, Zimbabwe ichange ichimirirwa zvekare neNgezi Platinum Stars iyo ichange ichitamba muCaf Confederation Cup.