Mutungamiri webato rinopikisa reMDC VaMorgan Tsvangirai neChina vakatanga rwendo rwemazuva mana kuMashonaland Central Province.
Nemusi weChina VaTsvangirai vakaita musangano paMuzarabani Business Centre.
Zvinonziwo pane chimwe chitoro kuMuzarabani pedyo nepamuzinda waShe Chiweshe, varidzi vechimwe chitoro vanotengesa sadza vakaramba kuri tengesera vatsigiri veMDC vainge vachibva pamusangano waVaTsvangirai vachityira kuti vanosara voitwa kanyama kanyama.
Nzvimbo iyi inozivikanwa seyakaberekera ingwe kubato reMDC. VaTsvangirai vange vachitaura nevatsigiri vavo nevamwe vakuru mubato ravo. Asi mutauriri webato reMDC VaObert Gutu vanoti havatye kupinda munzvimbo iyi vachiti vane chivimbo nerutsigiro rwavo ikoko.
Musangano waVaTsvangirai unonzi wakafamba hawo zvakanaka asi vatsigiri veMDC munzvimbo iyi vanoti vakarara vachityisidzirwa nevanofungidzirwa kuti vatsigiri veZanu-PF kuti vakaenda kumusangano uyu vanenge vazvisikira moto muziso.
Zvitoro zvizhinji zvinonzi zvakavharwawo pachina kuonekwa kuti ndiyani achaenda kumusangano waVaTsvangirai. Mashonland Central inzvimbo inowanzoitika mhirizhonga yakanyanyisa munguva yesarudzo.
NeChishanu, VaTsvangirai vanenge vari panzvimbo Growth Point, neMugovera vanenge vari paNyava Business Centre uye vachapeta rwendo rwavo kuMt Darwin.