Sangano re Zimbabwe Solidarity Forum, rakamiririra masangano anoona nezvekodzero pamwe nemagariro evanhu, nhasi rakurudzira vemapato ose anoita zvematongerwe enyika ose achange achikwikwidza musarudzo dzichaitwa mwedzi unotevera, kuti vasakakavadzana kana kurwisana pachavo panguva yesarudzo kana pachazodomwa zita revanenge vakunda musarudzo iyi.
Mushure mekunge mutungamiri wenyika VaEmmerson Mnangagwa vadoma zuva resarudzo, sangano re ZSF riri muSouth Africa, rashora sangano rinoona nezvesarudzo re Zimbabwe Electoral Commission, nekushandisa kwaro nhengo dzemauto, mukufambiswa kwebasa resarudzo.
Vachitaura pamusangano waitwa nhasi wapindwa nemasangano akazvimiririra anorwira kodzero dzevanhu, Muzvare Tilda Mawarire, vanomiririra sangano reCIVICUS World Alliance, vanoti chinangwa chemusangano uyu, change chiri chekuronga kutumidzira nhengo dzavo kuti dzinoongorora mafambiro esarudzo dzichaitwa mukupera kwemwedzi unouya.
Mutauriri we ZSF, VaMunjodzi Mutandiri, vati sangano ravo rinoda kuti kana ZEC iri pachokwadi kuti sarudzo dzichange dziri pachena nemuchokwadi, inofanira kuongorora chichemo chekuti mauto haafanire kunge ari kuendeswa kumatunhu achaitirwa sarudzo uyewo hurumende nemutungamiri wenyika, vanofanira kuona kuti mauto adzoserwa kumakamba awo.
Imwe nhengo yesangano re ZSF, Reverend Sipho Theys, vanoti chinangwa chegungano iri, changa chiri chekuda kukurudzira hurumende yeZimbabwe kuti iite sarudzo dzine chokwadi uyewo nekukurudzira hurumende yeSouth Africa kuti ishandise masimba ayo mukuona kuti sarudzo idzi dzaitwa muchokwadi here.
Nhengo dzemasangano ange ari pamusangano uyu dzati dzinovimba kuti mhuri yeZimbabwe, hurumende, boka rinoona nezvesarudzo pamwe nerunyararo musangano re SADC, reSADC Electoral Advisory, vachaona kuti sarudzo idzi dzichaitwa murunyararo.
Asi sachigaro veZEC, Justice Priscilla Chigumba vakaramba kare kuti muZEC mune vachiri muchiuto, asi kuti pane vaimbove muchiuto. Vakati vaimbove muchiuto ava vane kodzerowo yekushanda kuboka ravo sezvingoitawo munhu wese anenge achitsvaga basa.
Facebook Forum