Chimwe chikwata chevakarwa hondo chinofungidzirwa kuti chiri kudivi riri kutsigira gurukota rezvemitemo, VaEmmerson Mnangwagwa, chinonzi chiri kuita musangano weextra ordinary congress neMugovera kuMasvingo.
Musangano uyu unonzi uri kuda kutsiva hutungamiri hwaVaJabulani Sibanda, avo vanonzi nechikwata ichi havachisiri ivo mutungamiri wesangano revakarwa hondo reZimbabwe National Liberation War Veterans Association, vachipomerwa mhosva dzakasiyanasiyana kusanganisira kuzvidza mutungamiri wenyika, VaRobert Mugabe.
VaSibanda vari kupomerwawo zvakare mhosva kutsigira chikwata chonzi chinotsigira mutewedzeri wemutungamiri wenyika Amai Joice Mujuru.
Chikwata chevakarwa hondo ichi, icho chinonzi chiri kutungamirwa nevakuru vari kuzvidaidza kuti The Elders, chinotiwo mutauriri weZanu PF VaRugare Gumbo vanofanirwa kusiya basa sezvo vakataura panhepfenyuro yeZBCkuti nyaya yekuti ndiyani achatsiva VaMugabe ichapedzwa kukongiresi.
Asi mumwe wevakarwa hondo uye achitungamira rimwe sangano revakarwa hondo reZimbabwe Liberators Peace Initiative, vanoti musangano uri kurongwa uyu uri kunze kwebumbiro remitemo yevakarwa hondo sezvo usina kutsigirwa nematunhu ose emunyika ari gumi.
VaMkandla vanoti vari kuzviti vatungamiri vevakarwa hondo ava vamwe vavo vari pasi zvikuru kana pachitariswa vanhu vakarwa hondo, vakaita saVandimosi Gumede, VaAmbrose Mutinhiri nevamwe.
Mashoko aya atsinhirwawo nemumwe wevakarwa hondo, VaBernard Manyadza, avo vaizivikanwa nezita reChimurenga rekuti Parker Chipoera, avo vatiwo vazhinji vevari kunzi vakarwa hondo ava vanhu asina kana kumboenda kuhondo yacho, kana kuti vakadzidziswa kurwa vari mumabhesi emunyika.
