Bato reMDC-T mudunhu reMashonaland West ratanga chirongwa chekutsvaka rutsigiro zvakakwana nekudzidzisa nhengo dzaro dzakanyoresa kukwikwidza musarudzo kuti dzinodzidzisawo veruzhinji sei uye kuti vanyatsotsanangura musiyano weMDC-T inotungamirwa namuzvari Thokozane Khupe neMDC Alliance.
Nhengo dzebato iri dzanga dzichidarika zana dzakaungana pamahofisi emuChinhoyi dzichidziswa kukwezva rutsigiro, donzvo remusangano nezvichaitwa nehurumende yavo kana vasarudzwa mwedzi unouya uye kunotsanangurira veruzhinji nezvekusiyana kwebato ravo neraMuzvare Thokozani Khupe kana vovhota.
Sachigaro wedunhu remashonaland West VaRalph Magunje vanoti ichi chiitiko chekutanga chakafungwa nedunhu ravo kuti riwane mavhoti akawanda emutungamiri wenyika.
VaMagunje vanoti musangano wanezuro waidzidzisa nhengo dzavo nehurongwa hwekutsvaka rutsigiro mudunhu uye kuti dzizive nezvegwara ravo kana kuti kuti manifesto yavo.
Mumwe akapinda mumusangano uyu VaElija Karemba avo vachakwikwidza kuMakonde vanoti vakadzidza kuti vachanotsvaka rutsigiro rwemutungamiri webato VaNelson Chimasa nekudzidzisa vabereki pekuvhotera.
Apo nhengo dzeMDC-T dzakange dzichidzidzisana, nhengo dzebato reZanu PF dzainge dzatove mundima dzichitsvaka rutsigiro rwenhengo dzavo dzemakanzura, dzemuparamende nedzemutungamiri wenyika.
Vachitaura pamusangano muChegutu, nhengo yeparamende VaDexter Nduna vakaparura musangano wekutvsaka rutsigiro vachiti nhengo dzavo dzinofanira kuvhotera nhengo dzeZanu PF dzose kwete kurovera bhora musango pane zvimwe zvigaro.
VaNduna vanoti nhengo dzavo dzinofanirwa kuvhotera nhengo dzeparamende dzeZanu PF kuti mutungamiri wavo asavhiringwe nenhengo dzemapato anopikisa kana vakunda.
Zvichitevera kunyoresa kukwikwidza kwakaitwa nemusi weChina svondo rapera, mapato ari kuita chipatapata nhaka yemakonzo kutsvaka rutsigiro rwenhengo dzawo munyika yose.
Facebook Forum