Mubato reZanu-PF munonzi muri kuitika mhirizhonga inotyisa apo bato iri riri kuyedza kusarudzo vatungamiri vatsva mumatunhu akasiyanya siyana munyika.
Bepanhau re NewsDay rinoti nemusi weChipiri vechidiki vebato iri vakarwisana kuHighfield apo paiferefetwa kuti ndevapi vanhu vangavhote musarudzo dzekutsvaga vatungamiri vebato kumatunhu madiki, districts.
Zvinonzi kunetsana kuri pakati pevanhu vanonzi vari kuzviti vanotsigira mumwe mutevedzeri wemutungamiri wenyika, VaEmmerson Mnanangagwa, nevanonzi vari kutsigira Amai Grace Mugabe nechikwata chiri kuzviti Generation 40.
Kunetsana kwakatanga neMuvhuro.
Mumiriri weHighfield West muparamende, VaPsychology Mazivisa, vati havakwanise kutaura nezvenyaya iyi sezvo vange vari mumusangano.
Kunewo kugeda geda kwemeno kuManicaland uko nhengo dzebato dzakarwisanawo mukupera kwesvondo.
Nhengo dzebato iri dziri kunetsanawo zvinotyisa kuMashonaland East nekuMasvingo.
Zvichakadaro, nhengo dzebato reMDC -T gumi nenomwe, kusanganisa nhengo yedare reparamende yeHarare East, VaEric Murai, avo vakasungwa kuHopley, Harare South nemusi weSvondo, dzakapihwa mukana wekubvisa mari yechibatiso neChitatu inosvika mazana maviri emadhora pamunhu .
Nhengo dzeMDC idzi dzange dzichipomerwa mhosva yekukonzera mhirizhonga mushure memusangano waida kuitwa neMDC, asi ukazovhiringidzwa nemapurisa.
Mutauriri wemapurisa, Senior Assistant Commissioner Charity Charamba, vanoti vanhu ava vakatyora chikamu cheCriminal Law Codification and Reform Act vachinzi vakakonzera mhirizhonga mushure mekunge vaita musangano wainge warambidzwa nemapurisa.
Mapurisa anoti aityira kuti paizoita mhirizhonga.
Asi veMDC vanoti zviri kuvashamisa kuti vanhu veZanu-PF vavanoti vakavarwisa svondo rapera racho havana kana kusungwa nemapurisa.
