Vafundisi vesangano reZimbabwe Pastors’ Fellowship neMuvhuro vapikisa mashoko emhuri yekwaDzamara ekuti vakakambira hurongwa hwemunamato wekunamatira murwiri wekodzero, VaItai Dzamara, avo vakasvitsa neSvondo mazuva zana vapambwa.
Mutungamiri wesangano iri, Reverend Watson Furayi, vanoti sevafundisi vakakumbirwa kuti vafambise hurongwa hwekunamatira VaDzamara, uye kuzivisa mapurisa nezvehurongwa uhwu, uhwo hwaifanirwa kunge hwakaitwa kuZimbabwe Grounds mumusha weHighfield, muHarare.
Reverend Furayi vanoti vatoshamiswa kuona mumapepa mashoko akaburitswa nemhuri yaVaDzamara achivatakata kuti ndivo vakakonzeresa kusendekwa kwemunamato uyu.
Asi mutauriri wemhuri yekwaDzamara, Doctor Patson Dzamara, vanoti Reverend Furayi vakanga voita zano ndega pahurongwa uhwu.
Doctor Dzamara vanoti Reverend Furayi vakaenda nerweseri vachinyora tsamba yekuti sangano ravo rakanga rave kusendeka munamato uyu sekunge ndivo vaitungamira hurongwa uhwu.
Vanoti semhuri vacharonga zuva ravachaona rakakodzera kuti vaenderere mberi nemunamato uyu.
Vamwe vane ruzivo nezvakaitika svondo rapera vanoti nhengo yeMDC T, VaJob Sikhala, mumwe wevanhu vakakonzerawo nyonganyonga muhurongwa uhwu mushure mekunge vafonera mapurisa vachida kunzwa nezvetsamba yakanga yanyorwa nevafundisi.
Bato reMDC T rakange razivisawo mapurisa kuti ndiro riri kuita hurongwa hwekunamatira VaDzamara, izvo zvakapa kuti pave nemibvunzo pamusoro pehurongwa uhu.
Mutauriri weMDC T, VaObert Gutu, vakabvuma svondo rapera kuti sebato, vakazokanzura chiziviso chakanga chaiswa kuitira kuti zvinhu zvifambe nyore.
Asi VaSikhala vanoti bato ravo rakanga risineyi nehurongwa uhwu uye tsamba yarakanyorera kumapurisa yaive yekuzivisa nezvemusangano wezvematongerwo enyika, kwete wemunamato.
Vanoti bato ravo mudunhu reHarare ndiro raida kutenda vanhu nekuteerera kurudziro yaro yekuti vasapinda musarudzo dze by-election dzichangobva kuitwa muHarare nemamwe matunhu emunyika.