Accessibility links

Breaking News

Mushandi weHurumende Anomiswa Pamberi peDare neKuba Rubatsiro rweCyclone Idai


Vamwe vashandi pamwe nevezvematongerwo enyika vari kupomerwawo mhosva yekuba rubatsiro rweCyclone Idai.

Mumwe mukuru wekamba iri kuchengeterwa rubatsiro rweCyclone Idai, yeSilverstream, iri kuChimanimani, kuManicaland, uye vari mutevedzeri wemukuru anoona nezvehunyanzvi mubazi rezvemadzimai, Amai Christine Chideme, vakamiswa pamberi pedare kuChipinge vachipomerwa mhosva yekuba rubatsiro.

Amai Chideme vari kupomerwa mhosva yekuba rubatsiro rwakasiyanasiyana rwunokosha zviuru zvitatu zvemadhora rwaifanirwa kuenda kuvanhu vakavhiringidzwa nedutumupengo Cyclone Idai. Gweta riri kumirira Amai Chideme, VaLangton Mhungu, vatenda kuti Amai Chideme vakasungwa vachipomerwa mhosva iyi, iyo vanonzi vari kuramba.

Amai Chideme vanonzi vakanyimwa mukana wekubvisa mari yechibatiso.

Svondo rapera vamwe varume vaviri vakasungwawo nemapurisa maRusape mushure mekuwanikwa vaine zvinhu zvinofungidizirwa kuti zvakabiwa kuChimanimani, zvaifanirwa kubatsira vakawirwa nedambudziko.

Vamwe vezvematongerwo enyika vari kupomerwawo kushandisa masimba avo mukuba chikafu nerumwe rubatsiro.

Facebook Forum

XS
SM
MD
LG