Dare redzimhosva rarasa nyaya yanga ichipomerwa vatungamiri vatatu vesangano rakazvimirira reCrisis in Zimbabwe Coalition, richiti vatatu ava vakatyorerwa kodzero dzavo nekugariswa muhusungwa kwenguva inodarika yakatarwa nemutemo.
Mutongi wedare ramejasitiriti muHarare, VaTendai Mahwe, vati vanhu ava vakagariswa muhusungwa kwenguva inodarika maawa makumi mana nemasere anodiwa nemitemo yenyika.
Vatatu ava, vanoti mutauriri wesangano iri, VaMfundo Mlilo, vanoona nezvezvirongwa zvesangano iri, VaNixon Nyikadzino, pamwe nemutevedzeri wasachigaro, VaDirk Frey, vakasungwa neMugovera pamatare eHarare Mejasitiriti vachipomerwa mhosva yekukonzera kusagadzikana pamwe nekutora mifananidzo yejeri reHarare Remand Prison neChishanu chapfuura.
Vakanga vaenda kumatare uku vachida kunonzwa kutongwa kwevamwe vatatu vanoti mutori wenhau, Edgar Gweshe, nevanorwira kodzero dzevanhu vanoti VaCharles Nyoni naVaDon Makuwaza, avo vakasungwa neChishanu vachipomerwa mhosva yekutorawo mifananidzo yejeri reHarare Remand Prison.
Vatungamiri veCrisis in Zimbabwe Coalition ava vanga vachimirirwa negweta, VaGift Mutisi, veMusendekwa Legal Practitioners uye vari nhengo yeZimbabwe Lawyers for Human Rights.
Vachitaura vakamirira vamwe vavo, VaMlilo vanoti mutongo uyu unoreva kuti mapurisa anogona kutanga zvakare kuferefeta nyaya iyi, kana kuti anogona kuzovashevedza zvakare kudare kuburikidza nenzira yemasamanisi.
