Vashandi vehurumende vanoti vari kufara nekuedza kumutsiridzwa kwenhaurirano dzemihoro pakati pehurumende nevashandi vayo, dzeNational Joint Negotiating Council, NJNC, zvichitevera kuendeswa kwemazita matatu kuhurumende kuti idome sachigaro wenhaurirano idzi nemutevedzeri wake.
Mazita anonzi akazoendeswa kugurukota rezvevashandi, Amai Priscah Mupfumira, anonzi ndera vangonzi VaChimbunde, VaChigwendere nevamwe vanzi VaJambwa.
VaChimbunde naVaChigwendere vanonzi vakatombovewo masachigaro e NJNC.
Sachigaro weApex Council, VaRichard Gundani, vanoti kusavepo kwasachigaro weNJNC kwegore rose kunonzi kwakatadzisa vashandi vehurumende kuti vawane mukana wekutaurirana nehurumende pamusoro penyaya dzakawanda dzinosanganisira dzemihoro.
VaGundani vanotiwo havatambiri kurudziro yegurukota rezvemari, VaPatrick Chinamasa, pamwe nagavhuna weReserve Bank of Zimbabwe, Doctor John Mangudya, yekuti vashandi vambomira kuwedzerwa mari dzemihoro sezvo hupfumi hwenyika husina kumira zvakanaka.
VaGundani vanoti nyaya dzemihoro dzinofanirwa kutaurwa nezvadzo pamatare akaita sereNJNC nereTripartite Negotiating Forum.
