Accessibility links

Breaking News

MDC Alliance Inoti Yakakunda Zvine Mutsindo Musarudzo


Tendai Biti of the Movement for Democratic Change (MDC) Alliance, speak to reporters in Harare, July 12, 2018.
Tendai Biti of the Movement for Democratic Change (MDC) Alliance, speak to reporters in Harare, July 12, 2018.

MDC Alliance inoti yakakunda musarudzo dzanezuro nekune rumwe rutivi Zanu PF ichitiwo yakakunda zvine mutsindo.

Vachitaura pamusangano wavaita nevatori venhau pamuzinda weMDC-T inotungamirwa naVaNelson Chamisa paMorgan Tsvangirai House muHarare, mumwe wevatungamiri vemapato ari mumubatanidzwa weMDC Alliance, VaTendai Biti, vati VaChamisa vakakunda musarudzo dzanezuro asi komisheni inowona nezvesarudzo yeZimbabwe Electoral Commission Zec, iri kuita madanha kunonoka kuburitsa zvakabuda musarudzo.

VaBiti vati seMDC Alliance vakabatanidza zvose zvakabuda musarudzo dzanezuro vakaona kuti vakakunda musarudzo idzi.

Nekune rumwe rutivi, munyori anoona nezvemitemo Zanu PF, VaPaul Mangwana, vatiwo bato ravo riri kutarisira kukunda musarudzo idzi.

Mushure mezvataurwa naVaBiti, vatsigiri veMDC Alliance vabva vatanga kupemberera panze pemuzinda weMDCT yaVaChamisa.

Mmwe mutsigiri weMDC Alliance, VaKillian Nyamutsikwa, vati vachamira naVaChamisa kunyange zvodii.

Zvichakadai, VaBiti vapomera mutevedzeri wemutungamiri wenyika VaConstantino Chiwenga mhosva yekuronga zvekuuraya VaChamisa pamwe naivo VaBiti.

Mutauriri wemapurisa Senior Assistant Commissioner Charity Charamba vati havasati vanzwa kuti nyaya iyi yakamhan’arwa kumapurisa here kana kuti kwete.

Asi VaMnagwana, avo vanova zvakare mutevedzeri wemutauriri weZanu PF, vati hapana chikonzero chekuti VaChamisa naVaBiti vauraiswe nebato ravo.

Hatina kukwanisa kutaura nemutauriri weZanu PF, VaSimon Khaya Moyo, kuti tinzwe divi ravo panyaya iyi.

Facebook Forum

XS
SM
MD
LG