Kwakave remakuwerere muOlympic Games Aquatics Centre apo Kirsty Coventry aipinda munhandare emakwikwi emaOlympic Games kekugumisira muhupenyu hwake.
Hama neshamwari nevatsigiri vaKirsty Coventry vakaungana muOlympic Games Aquatics Centre kupemberera zuva iro Kirsty Coventry akapinda mumvura kekupedzisira mukukwikwidza ema Olympic Games mushure memakore gumi nematanhatu emamenduru nemaWorld Records
Maivewo negungano kunyange vaive vashoma revanobva kuZimbabwe avo vaisimudza mureza wavo vasingade kusarira mubabiko ekupemberera nhororoondo yakakosha iyi.
Pakabuda Coventry achigadzirira kutanga kwe 200 metre backstroke final kwakave neruzha rwukuru apo veruzhinhi vaiyeuka mashiripiti a Coventry mumakore apfuura nemaWorld Records ayo aingowisira pasi.
Asi Coventry aive asina zvekuita kunze kwekusimudza ruoko.
Ruzha urwu rwakatonyanya apo Coventry akapedza ari pachinhanho chechitanhatu mufainari ye 200 metre backstroke unove ndiwo waive makundano ake ekugumisira.
Uku kwakave kupedza rwendo zvine mutsindo mushure memakore gumi nematanhatu ayo Coventry akatora menduru nomwe, mbiri dze goridhe, ina dzesirivha pamwe neimwechete yebronze.
Coventry ari kupinda munhoroondo semutambi akatora menduru dzakawandisa muAfrica kubva kuma Olympic Games.
Pamusoro pezvo, Coventry achapinda muzvinyorwa semutuhwini wechikadzi akatora menduru dzakawandisa kubvira mitambo iyi yatangwa.
Muongorori wezvemitambo VaMartin Makoni vanoti yave nguva yekuti Coventy achizorora vachiti ivo zvaakaita zvese zvichapinda muzvinyorwa zvichaverengwa makore anotevera.
Mutsigiri wezvemitambo VaElisha Musabayana vanoti zvakaitwa naCoventry zvinofanira kukudzwa.
Totarisa zvimwe zviri kuitika kumaOlympics.
Hamuna mufaro kumaOlympics mushure mekunge mumhanyi wenzendo refu Rutendo Nyahora akaona zvakaoma mu 42 kilometre marathon ndokupedza ari pachinhanho chemakumi mapfumbamwe nepiri.
Vamhanyi zana nemakumi masere nevanomwe ndivo vakakwikwidza mumujaho uyu, makumi matatu nevapfumbamwe avakaundikana kupedza nzendo.
Zvichakadaro, mumwe mutambi wemuZimbabwe Gabriel Mumbure akakundikana zvekare kusvika muma semi fainari e 100 metres mushure mekupedza ari pachinhanho chechitanhatu mugungano ranga risina kuoma.
Muvhuro uno, Zimbabwe haina mutambi ari kukwikwidza asi mangwana, Tatenda Tsumba achange achikwikwidza mu 200 metres.
Totarisa munyaya dzanhabvu…..
Zvikwata zvese zvitatu zviri pamusoro zvakadonhedza mapoinzi maviri mushure mekuita mangange izvo zvasiya pasina shanduko pamamiriro ezvikwata patafura.
FC Platinum yakaita mangange 1-1 ne Mutare City mumutambo uyo murairidzi wechikwata ichi Norman Mapeza akasara achizhamba kuti vakomana vekwaMutare vaive vauya kwete kuzotamba bhora asi kuzovhara zvibodzwa.
Asi Kugona Kunenge Kudada yakakwanisa kubuda nepoindi imwe chete ndokuramba iri pamusoro peCaps United ne mapoinzi maviri. Caps United yakaita mangange 0-0 neHwange.
Vatambi vechikwata ichi vaive varamba kuenda kunotamba mutambo uyu nemhaka yekusatambiriswa mari yavo yemihoro neyekukunda mitambao yavakatamba kare.
Mumwe mutsigiri wechikwata ichi Prosper Muzanharwo ari kudivi revatambi pakuramwa kwavo basa.
Dynamos yakapinda mumangange ayo achishanu mumitambo mitanhatu mushure mekuita 1-1 neBulawayo City, izvo zvasiya mumusha mavo muine mutauro.
Mimwe mitambo yakaperea seizvi
Chapungu 0-1 ZPC Kariba
Harare City 2 0 Border Strikers
Ngezi Platinum Stars 0-2 How Mine
Tsholotsho 0 -1 Triangle