Vateveri venhabvu muZimbabwe varamba kusaririra mumafaro eEuro 2016 Cup final.
Kwese kwese kwauri kufamba nyaya ndeyekuti ndiani achatora mukombe weEuro 2016 pakati pechikwata chiripamusha che France nePortugal apo zvikwata izvi zvirikusangana mumutambo wekugumisira muParis France nesvondo.
Mitambo yakadai inoteverwa nechaunga muZimbabwe zvekuti vamwe vanombokanganwa zvemitambo yemuno sezvo vachitarisira zvekare kuwana mari sezvo vave kurarama nekubheja nhabvu yekunze nemhaka yekushaikwa kwemabasa.
Asi vakawanda vavo vanobvuma kuti mwedzi wemaEuro 2016 wanga wakaoma sezvo vasina kuita mari nemhaka yemafambiro anga achiita mitambo apo zvikwata zvisina mukurumbira zvakaita se Iceland, Wales, ne Hungary zvanga zvichirura.
VaSydney Mudavanhu vanoti maEuro 2016 anga asina kuvamirira zvakanaka sezvo vakarasikirwa nemari zvinji vachiedza kudoma zvikwata zvinokunda zvichiramba.
Asi vaMudavanhu vanoti vanechivimbo chekuti mari yavo yese inodzoka neimwe pamusoro sezvo France irikutora mukombe.
VaMudavanhu havasi vega mumafungiro iwaya sezvo muongorori wezvemutambo wenhabvu vaAndrew Rwodzi vanoti France inesimba rakawandisa zvekuti vanokunda mutambo uyu uchiripo.
Nhengo yeZimbabwe National Soccer Supporters Association vaSpencer Muwashu vanoti vanga vachitevera mitambo iyi kubvira zuva rekutanga zvekuti varikuona chikwata chirikudhererwa chePortugal chichenda nemukombe.
Kunyanga hazvo vakawanda vane mafungiro avo nezvemutambo uyu, zvirikuratidza izvo kuti vakawanda vacho ndivo varikuti France inokunda nekuti yakasimba, inechaunga, uyezve neruzivo rwenhandare yavarikushandisa.
Mutungamiri weZimbabwe Football Association vaPhillip Chiyangwa varimuParis imomo kuoona mutambo mukuru uyu.
Zvakamira zvakadai. Makundano eCastle Lager Premier Soccer League arikupinda munharaunda yegumi nenhatu paine mitambo yakaoma pazvikwata zviripamusoro soro.
Mutambo mukuru ndeuyo uriku kuMandava Stadium uko chikwata chiri pachinhanho chechipiri cheFC Platinum chiri kubandana neCaps United iyo iri pachinzvimbo chechipiri.
FC Platinum irikutungamira Caps United nepoindi imwechete zvekuti kukunda kwavo mumutambo uyu kunosiya vave pamberi nemapoinzi mana asi kukundwa kwavo kunosiya maGreen Machine ave pamusoro izvo vekuKugona Kunenge Kudada vasirikuda.
Asi muongorori wezvemutambo wenhabvu vaSimon Mukungate vanoti zvikwata zviviri izvi hazvisi mugungano rimwechete sezvo FC Platinum iri pamberi uyezve yatotora mapoinzi matatu.
Highlanders iyo iri pamusoro pamakundano aya, irikutarisira kukangwanwa kudamburwa kwavakaitwa 2-0 neChicken Inn svondo rapera nekukunda Triangle muBaborufields Stadium kuti varambe varipamusoro, panguva imwecheteyo, ZPC Kariba irikutarisira zvekare kukunda apo irikufamba yakananga kuBaobab kunotamba neNgezi Platinum Stars.
Dynamos iyo irikubhebha moto, ine mapoinzi matatu aripachena kubva kuchikwata chiripasi pasi cheBorders Strikers muRufaro Stadium apo Moses Chunga neHarare City yake vakatarisana neHow Mine muRufaro Stadium asi mangwana.
Mimwe mitambo iriko yakamira seizvi….
Hwange v Bulawayo City Colliery
Chapungu v Chicken Inn. Ascot Stadium.
Totarisa mumutambo werugby…
Murairidzi wechikwata cheZimbabwe Cyprien Mandenge haasi kuita zvekutamba nebasa mushure mekunge aunganidza chikwata cheZimbabwe chakasimbisisa pamutambo wavo weAfrica Cup Division 1A neKenya muHarare Sports Club mangwana.
Zimbabwe haisi kutamba zvakanaka mazuva ano asi Mandenge aunganidza vatambi varikubva kunze kwenyika nevanotambira zvikwata zvemuno kuti aone kuti Zimbabwe inokwanisa kutanga kukunda zvekare here.
Mandenge adeedza Costa Dinha uyo anga-amboregedza mutambo uyu aine makore makumi matatu nemasere.
Dinha arikutarisirwa kutamba zvine mutsindo zvekare nanaTangai Nemadire, Denford Mutamangira, Fortune Chipendo, na Jaques Leitao, kuti Zimbabwe itore mapoinzi ese kubva paKenya.
Zimbabwe inofanira kukunda mumutambo wavo wekutanga neKenya kuti vazvivhurire mukana wekupedza varipamusoro pegungango rezvikwata zvina uyezve nekutora zvekare mukombe uyu uyo vakatorerwa neNamibia gore rapera.
Kunze kweKenya, neZimbabwe, zvimwe zvikwata zviri mugungano iri iUganda neNamibia iyo inemukombe wacho.
