Mutauriri wesangano reTajamuka VaPromise Mkwananzi vakamiswa pamberi pedare remejastiriti vakanzi vazodzoke kudare nemusi weMuvhuro.
VaMkwananzi vakasugwa nemusi weChishanu vachipomerwa mhosva yekukonzera mhirizhonga yakaitika muHarare nemusi weChitatu.
Mutongi wedare ramejastiriti VaTendai Mahwe ndivo vakanzwa nyaya yaVaMkwananzi nevamwe varume gumi nevatatu.
Pamhirizhonga iyi mapurisa anonzi akakandira vechidiki veMDC Youth Assembly nevanhuwo zvavo hutsi hunokatyidza zvakabva zvaita kut vanhu vatange kuita hwakiti nagonzo vachiputsa zvinhu.
Motokari mbiri dzemapurisa neimwe yeZBC dzakapiswa. Vechidiki ava vairatidzira vachiti havasi kufara nenyaya yavaipomera mapurisa yekutyora kodzero dzevanhu.
Sangano reZimbabwe Lawyers for Human Rights rinoti nemusi weChishanu change chiri chipata pata kutsvaga vanhu vakawanda vainge vachisungwa vamwe vachipambwa nemapurisa nevasori.
Mumwe akapambwa ndiVaGift Ostallos Siziba avo vanonzi vakazowanikwa kuHarare Central Police Station.
Mumwe mutori wenhau anotora mifananidzo James Jemwa akapambwawo uye haasi kuzivikanwa kuti ari kupi.
KuGleview Amai Kerina Dewa vanova mutevedzeri wasachigaro webato reMDC-T mudunhu reHarare vane makore makumi matanhatu nerimwe vakapambwa kumba kwavo nevanhu vainge vakapakatira zvombo havasi kuzivikanwawo kuti varipi.
VaSten Zvorwadza veNational Vendors Union Zimbabwe vakambobvunzurudzwa nemapurisa vakazoeregererwa.