Munyori mukuru musangano revakarwa hondo reZimbabwe National Liberation War Veterans Association VaVictor Matemadanda vanoti pane vanhu vakayedza kuvatevera uye vakatora mifananidzi yavo apo vainge vari muHarare.
Vachitaura neStudio 7 VaMatemadanda vanoti pavange vakamira vakagara mumotokari mavo vazoona mapurisa mazhinji ange ari mumotokari yasvikomira pedyo navo vachibva vatanga kusora.
”Ndaona mapurisa anogona kusvika mashanu vachibuda mumotokari vachibva vatanga kutora mapikicha..mumwe ange achisahandisa cell phone kutora vhidhiyo.”
VaMatemadanda vanoti pavaratidza kuti vaona zviri kuitika mapurisa aya adududza achidzokera mumotokari. VaMatemadanda vanoti motokari yange yakanzi ZRP Reaction Unit.
Vati mutsvakiridzo yavo vazoona kuti motokari iyi ndeyekuhofisi inochengetedza mutungamiri wenyika. Pabvunza VaMatemadanda kuti havasi kutya here vati ivo munhu akadzidziswa zvechiuto nekudaro kana vakaurayiwa vanofa vambomiramira nekuti “atsunya arwa". Hatina kukwanisa kubata vakuru vemapurisa kuti tinzwe divi ravo.
VaMatemadanda nevamwe vakuru vebato ravo vakadzingwa mubato reZanu-PF mushure mekunge vapomerwa mhosva yekunyora gwaro raiti vainge vagura muchato nemutungamiri wenyika VaRobert Mugabe vachivapomera mhosva yekutadza kutungamira nyika.
