Mutauriri sangano reZimbabwe National Liberation War Veterans Association vanoti mapurisa akavanyomba nezvemhuri yavo apo vakavasunga. VaMahiya vanoti vakaendeswa mutirongo kuMatapi kuMbare uko kwakanzi nedare hakufanire kuendeswa vasungwa.
Dzimwe nhengo dzeZNLWA mbiri dzakazvipirawo kumapurisa muHarare nemusi weChipiri dzichibva dzasungwa.
Vakazvipira ndiVaHoyini Samuel Bhila vanova mutevedzeri wasachigaro wedunhu reHarare uye VaHeadman Moyo mutevedzeri wasachigaro wesangano iri.
Gweta ravo, Amai Beatrice Mtetwa vaudza Studio 7 kuti vaviri ava vabva vapomerwa mhosva yekunyomba mutungamiri wenyika.
Amai Mtetwa vatiwo vari kutarisira kuti munyori mukuru wesangano iri vaVaVictor Matemadanda uye VaFrancis Nhando vanoona nezvegwara remusangano vachaenda kudare mangwana.
VaMatemadanda vari kuchitokisi cheRhodesville ukuwo vanhando vari kuHighlands.
Vaviri ava vakasungwa nemusi weMuvhuro vaenda kudare kunonzwa nyaya yemutauriri wesangano ravo VaDouglas Mahiya avo vakazopihwa mukana wekubhadhara mari yechibatiso nedare ramejastiriti muHarare.
