Sangano ravanachirembare Zimbabwe Medical Association kana kuti ZIMA rinoti kutanga musi wa 1 Chikunguru rinenge risisatore makadhi anobva kumamedical aid societies akaita sePremier Service Medical Aid Society.
Izvi zvichapa kuti vanhu vakawanda vaomerwe nehupenyu. Izvi zvinotevera kunetsana pakati peZIMA ne Zimbabwe Revenue Authority kana kuti ZIMRA iyo inonzi iri kumanikidza vanachiremba kuti vabhadhare mutero chiripo ripocho kunyangwe hazvo mamedical aid societies ari kutora mwedzi yakawanda kuti abhadhare ZIMA.
Munyori mukuru weZIMA muMashonaland Dr Enock Mayida vaudza Studio 7 kuti kutanga mwedzi unouya vanenge votambira mari chete kwete makadhi kubva kuvarwere.
Dr Mayida vanoti vave nenguva vachiyedza kugadzirisa dambudziko iri asi vaona kuti kupedzera hoko padehwe retsindi.
Vanhu vakawanda munyika vari kukurudzura hurumende kuti igadzirise nyaya iyi sezvo vari kubatirwa mari dzvo asi voguma vitadza kurapwa. Hatina kukwanisa kubata gurukota rezvehutano Dr David Parirenyatwa sezvo vange vasingadaire nharembozha yavo.
