Vatsigiri venhabvu vatarisana nemachikichori emitambo apo makundano emuAfrica arikusimuka nemitambo miviri muZimbabwe.
MuBabourfields Stadium neMugovera vanotevera nhabvu vachange vachitamba ngoma yemutambo weCaf Champions League. MuHarare muRufaro Stadium vatsigiri venhabvu vachange vachiimba rumbo rweCaf Confederations Cup.
Aya ndiwo mamiriro akaita machikichori enhabvu apo shasha yemuZimbabwe Chicken Inn ichange ichidamburana neMamelodi Sundowns yekuSouth Africa panguva imwecheteyo Harare City iri kusanga neAS Adema yekuMadagascar muCaf Confederation Cup.
Sundowns iri kunanga kuZimbabwe ichipisa sezvo iri pamusoro pemakundano eleague yekuSouth Africa yeAbsa Premiership uyezve vakarova Kaiser Chiefs pakati pesvondo. Asi murairidzi weChicken Inn, VaJoey Antipas vanoti havasi kutarisa zvese izvi vachiti chikwata chvo chakagadzirira zvakakwana.
Mutambi wechikwata ichi Edmore Chirambadare uyo aive nechikwata cheZimbabwe kumaAfrica Nations Championships kuRwanda anoti kunyange vachiremekedza Sundowns vachatamba nepese pavanogona kuti vakunde.
Mutsigiri weChicken Inn VaLevison Ndudzo vanoti chikwata chavo chikakwanisa chete kukanganisa Khama Billiat kuti asatambe semazuva ese chinokunda.
Chicken Inn yakasimbisa chikwata chayo munguva yezororo nekutenga vatambi vakaita saTeenage Hadebe naObediah Tarumbwa kubva kuHighlanders, Moses Demera kubva kuFlame Lilly pamwe na Physiwell Madhazi kubva kuDongo Sawmills.
Vatambi vavo vane mukurumbira vakaita saDanny Phiri, Clement Matawu, Elvis Chipezeze pamwe naMichelle Katsvairo vachiriko kuchikwata ichi.
Zvichakadaro, mutsigiri weDynamos VaAndrew Rwodzi vanoti havasi kutyira maGamecorks mumutambo uyu vachiti ivo vane chivimbo chekuti vanokunda.
VaRwodzi vari kurudzira vatsigiri venhabvu kuti vaende kuBaborufields Stadium kunotsigira Chicken Inn sezvo iri kumirira Zimbabwe pamwe nezvikwata zvese zvisina kubudirira kuenda kumakwikwi aya.
Asi kuRufaro Stadium zviri kuratidza kuti Harare City haina dambudziko rakakura serine Chicken Inn sezvo iri kutamba neAS Adema iyo isina nhoroondo mumutambo wenhabvu muAfrica.
Pamusoro soro pakasvikwa nechikwata chekuMadagascar ichi munharaunda yechipiri muCaf Champions League mugore ra 2013 chete.
Harare City yakabuditsa zhunde remari kutenga vatambi vane mukurumbira vakaita sa Ronald Chitiyo naBlessing Moyo kubva kuDynamos, Raphael Manuvire kubva ku ZPC Kariba pamwe na Edwin Madhananga uyo vakatenga kuFlame Lilly.
VaNdudzo vanoti Harare City yakanyanyosimbisa zvekuti AS Adema yatove nhoroondo.
Totarisa munyaya dzekiriketi. Makundano eICC Under 19 World Cup asvika kumagumo kuchikwata cheZimbabwe mushure mekunge charohwa nemawiketsi mashanu neChishanu masikati neAfghanistan ndokutadza kutora mukombe wePlate.
Mutambi ashura mare ndiWilliam Mashinga uyo arova maranzi makumi matanhatu nemapfumbamwe achibatsirwa naAdam Keefe ayo abudawo nemakumi matatu nemapfumbwa emaranzi kuti Zimbabwe isvike pamaranzi mazana maviri, negumi nematanhatu.
Asi izvi zvashaya basa sezvo mutambi weAfghanistan Tariq Stankzai amuka chibhebhenenga ndokukanda maranzi zana nematanhatu kubatsira chikwata chake kusvika pamaranzi zana negumi nemasere.
Asi chikwata cheZimbabwe chiri kudzoka kumusha misoro yavo yakasimuka mushure mekushura mare zvanga zvisingatarisirwe neveruzhinji.
